Me flokë të verdhë deri te supet, vathë të artë dhe një fustan të kuq, Natalie Harp, e cila i mbijetoi kancerit, e prezantoi veten në Konventën Kombëtare Republikane të vitit 2020 si një amerikane e harruar më parë nga Kalifornia dhe e krahasoi Donald Trump me George Bailey, heroin e filmit klasik “It's a Wonderful Life”.
“E tëra çfarë mund të marrësh me vete është ajo që ke dhuruar. Z.President, kjo të bën njeriun më të pasur në botë”, tha ajo.
6 vjet më vonë, Harp është tani një nga ndihmëset më të ngushta dhe më të përkushtuara të Trump. Titulli i saj zyrtar i punës është asistente speciale e presidentit dhe asistente ekzekutive e presidentit me një pagë vjetore prej 150,000 dollarësh.
Titulli i saj jozyrtar i punës është "printer njerëzor" për ta furnizuar atë me printime informacioni. Për vite me radhë ajo ka qenë vetëm një personazh dytësor në rrethin e Trump. Por e gjithë kjo ndryshoi këtë javë kur Jon Ossoff, një senator demokrat dhe kandidat i mundshëm për president në zgjedhjet e vitit 2028, akuzoi Trumpin në një fjalim fushate se donte të “ndërtonte sallën e tij të vallëzimit dhe të udhëtonte me Natalie” në vend që të bënte punën e tij.
Deklarata shkaktoi një cunami spekulimesh në internet rreth natyrës së saktë të marrëdhënies së tyre. Të hënën, Trump sulmoi gazetaren e CNN, Kristen Holmes, pasi ajo i bëri një pyetje në lidhje me komentet e Ossoff, ndërsa ekipi anonim i "Reagimit të Shpejtë" i Shtëpisë së Bardhë i shkroi Holmes: "Një ditë, fëmijët tuaj do të shohin pyetjen tuaj të neveritshme dhe çnjerëzore".
Duke dashur të shuajë zjarrin, Shtëpia e Bardhë në fakt i hodhi më shumë benzinë atij duke rritur pa dashje reputacionin kombëtar të Ossoff mes demokratëve dhe duke ftuar miliona njerëz të bënin të njëjtën pyetje.
35-vjeçarja nga Kalifornia u diplomua në Universitetin Point Loma Nazarene, një kolegj i arteve liberale të krishtera në San Diego, në vitin 2012. Tre vjet më vonë, ajo mori një diplomë MBA nga Universiteti Liberty, një kolegj ungjillor në Lynchburg të Virxhinias.
4 vjet më vonë, teksa Trump po përgatitej për të kandiduar për t’u rizgjedhur, Harp bëri një postim në LinkedIn me titull: “Unë jam Prova e Gjallë – Partia e Kujdesit Shëndetësor është e Trump.” Duke kujtuar përvojën e saj me kancerin e kockave, ajo shpjegoi: “Më 9 nëntor 2015 – një vit nga dita kur Donald Trump do të fitonte presidencën – një infermiere e përzjeu intravenozin tim me substancën vdekjeprurëse të ujit steril duke më lënë të mbyllur në shtëpi dhe duke kërkuar kujdes.
Në vend që të studionin simptomat e mia për të diagnostikuar gjendjen time, shteti dhe vendi im i kontrolluar nga demokratët më ofruan opioide, barbiturate, marihuanë mjekësore, paaftësi, urdhra "Mos e ringjallni" dhe po, Vdekje me Dinjitet. Përpara një takimi, madje më udhëzuan të ndaloja vullnetarisht të ngrënit dhe të pirit (VSED)."
Harp vlerësoi nënshkrimin e Aktit të së Drejtës për të Provuar në vitin 2018 nga Trump, për dhënien e mundësisë për të pasur akses në trajtime eksperimentale që rezultuan të suksesshme. "Onkologu im nuk më tha se kisha mundësi të tjera. Donald Trump më tha... Tani shifrat e mia po stabilizohen dhe kështu është edhe dhimbja ime."
Postimi në LinkedIn tërhoqi vëmendjen e rrjetit konservator Fox News të Rupert Murdoch, i cili e ftoi Harp në transmetim për të folur rreth kësaj. Trump reagoi në mediat sociale: “Natalie Harp, e cila lufton kancerin në fazën 2 dhe po ia del shumë mirë, ishte një e ftuar e SHKËLQYER. Krenar për Natalie-n!”
Kjo pasoi me fjalimin e Harp me lëvdata për Trump në konventën kombëtare republikane, një muaj pas vdekjes së babait të saj. Ajo kritikoi Shërbimin Kombëtar të Shëndetësisë (NHS) të Britanisë pasi i ofroi një mesazh Trump: "Nuk do të isha gjallë sot nëse nuk do të ishe për ty".
Por një artikull i Washington Post hodhi dyshime mbi këtë pretendim, duke vënë në dukje se ekspertët theksojnë se “përshkrimi i Harp për trajtimin që ajo mori dhe afati kohor për marrjen e tij e bëjnë të pamundur që Trump të ketë pasur ndonjë ndikim në rastin e saj”.
Megjithatë, Harp dhe nëna e saj u larguan nga Kalifornia dhe u zhvendosën në një apartament në katin e 18-të në West Palm Beach, Florida, tre milje larg pronës së Trump në Mar-a-Lago. Në vitin 2020, Harp iu bashkua rrjetit të lajmeve “One America News Network” (OANN) të ekstremit të djathtë, ku si prezantuese ajo përforcoi "gënjeshtrën e madhe" të Trump se zgjedhjet presidenciale ishin vjedhur nga Joe Biden.
Harp u largua nga OANN në vitin 2022 dhe filloi të punonte për Trump, atëherë një ish-president që përballej me çështje penale dhe po bënte një përpjekje në dukje të pamundur për t'u rikthyer në Shtëpinë e Bardhë. Ajo i jepte atij një dietë me lajme të mira gjatë fushatës zgjedhore.
Gazeta “New York Times” raportoi në vitin 2024: “Ajo nuk ka një titull zyrtar, por gjatë fushatës, kolegët e quanin ‘printeri njerëzor’ sepse ajo e ndiqte Trump me një printer portativ dhe një bateri për ta karikuar atë, në mënyrë që t’i jepte atij informacione të printuara, siç preferon ai.”
Tani që Trump është rikthyer në Zyrën Ovale, Harp shihet shpesh në krah të tij dhe është bërë një ndihmëse e domosdoshme. Muajin e kaluar, kur presidenti u detyrua të ndërronte fshehurazi aeroplanët në Turqi për shkak të një kërcënimi të dyshuar për vrasje nga Irani, ajo ishte një nga të paktët njerëz që iu bashkua atij në një aeroplan ushtarak, ndërsa stafi dhe gazetarët e tjerë mbetën në “Air Force One”.
Një i njohur i Harp, i cili nuk donte të identifikohej, tha: “Askush nuk e vuri në dyshim [zëvendësshefin e shtabit] Dan Scavino që ndodhej në aeroplanin ushtarak, por sinqerisht Natalie është shumë më e aftë se Dan Scavino në shumë fusha. Ajo është e bukur nga çdo përkufizim dhe për shkak të kësaj njerëzit nuk e kuptojnë se sa inteligjente, elokuente, besnike, e besueshme dhe e angazhuar është ajo në politikë.”
Harp luan gjithashtu një rol të jashtëzakonshëm në formësimin e botëkuptimit të Trump dhe të rezultateve të tij. Thuhet se ajo i tregon atij postime në Truth Social - shpesh që përmbajnë përmbajtje të ricikluar - pastaj hyn në llogarinë e tij për t'i publikuar ato. Kjo përfshinte edhe një video raciste që i përshkruan Barack dhe Michelle Obaman si majmunë dhe një imazh të gjeneruar nga inteligjenca artificiale që e portretizon Trumpin si Jezu Krishti, sipas Wall Street Journal.
Në librin “Regime Change” të botuar këtë vit, gazetarët e New York Times, Maggie Haberman dhe Jonathan Swan, shkruanin se besnikëria e Harp shtrihej deri në shkrimin e “letrave adhuruese” për Trumpin, përfshirë njërën që shkruante: “Ti je e tëra që ka rëndësi për mua”.
Në njërën prej tyre ajo shkroi: “Dua të të sjell gëzim, të ndihesh sikur mund ta kalojmë një ditë pa pasur nevojë të flasim kurrë për ‘punën’.” Në një tjetër ajo tha: “Nuk dua të të zhgënjej kurrë” dhe e përshkroi Trumpin si “Rojtarin dhe Mbrojtësin e saj në këtë jetë”.
Haberman dhe Swan përshkruan gjithashtu një skenë tipike: “Harp përgjithësisht ishte në një karrige mënjanë, me laptopin hapur, kokën e përkulur, duke dëgjuar, por kurrë duke kontribuar përveç nëse urdhërohej nga Trump. Ajo përmbushte, menjëherë, çdo kërkesë, qoftë një “Trump 2028” që duhej të merrej nga dhoma e mallrave, një kërkim i shpejtë në Google, apo prodhimi i lajmit më të fundit nga faqet e internetit të krahut të djathtë si Breitbart ose Gateway Pundit.”
Përkushtimi i Harp ndaj Trump nuk i pëlqen vëllait të saj, Preston Harp, i cili jeton në kryeqytetin e Nikaraguasë, Managua. Ai i tha faqes së internetit Daily Beast muajin e kaluar: “Mendoj se ajo e sheh Trumpin si një lloj figure atërore sepse ai mishëron doktrinën e jashtëzakonshmërisë amerikane.”
Ndërkohë, reagimi i tërbuar i administratës ndaj fjalimit të Ossoff nënkupton se ai preku një nerv të hollë dhe duket se do të ftojë shqyrtim të mëtejshëm të Harp dhe rolit të saj në jetën e Trump. Kurt Bardella, një komentator politik dhe ish-ndihmës i Kongresit, tha: “Kjo sjell në vëmendje shprehjen e famshme: “Mendoj se ai proteston shumë”. Ata e bënë këtë një gjë më të madhe.
"Ekziston diçka në jetë që quhet përgjigje proporcionale dhe ajo që pamë nga Shtëpia e Bardhë ishte një përgjigje masive, e cila vetëm sa inkurajon më tej pyetjet dhe intrigat. Është si, “Oh, duhet të ketë një gjë atje që të bën të reagosh kaq ashpëe”. Nëse procesi i tyre i të menduarit do të ishte se kjo do të ulte spekulimet dhe thashethemet, kushdo që e mendoi këtë është idiot."/The Guardian
