Egnatia dhe Dinamo, sonte zbresin në fushë për ëndrrën e madhe evropiane...

TIRANE - Kjo e enjte është dita e Egnatias dhe Dinamos, dy skuadrave shqiptare që po kërkojnë të shkojnë sa më larg në futbollin evropian. Kampionia e Shqipërisë dhe fituesja e Kupës së Shqipërisë do të zbresin në fushën e lojës, teksa do të zhvillojnë ndeshjet e tyre të para në ‘play-off’-in e Europa League dhe Conference League.

Egnatia e ka shkruar tashmë historinë dhe e ka të siguruar pjesëmarrjen në fazën e grupeve në Conference League, por skuadra e drejtuar nga Nevil Dede do të kërkojë akoma më shumë, kualifikimin në fazën e grupeve në Europa League.

Pengesa e fundit drejt këtij objektivi për Egnatian janë norvegjezët e Lillestrom, një kundërshtar që mund të kalohet nga kampionët e vendit duke parë edhe paraqitjet e bëra në raundet e mëparshme.

Sfida do të luhet në orën 19:00 dhe Egnatia ka një avantazh në këtë përballje, faktorin fushë pasi luan përballë publikut të saj dhe një kohësisht ajo do të kërkojë të shfrytëzojë faktin se Lillestrom është në krizë rezultatesh teksa në kampionat në 4 ndeshjet e fundit nuk ka fituar asnjë.

Egnatia nuk do të ketë në fishe Ndrecan të skualifikuar për shkak të kartonit të kuq të marrë në sfidën e kaluar dhe vendin e tij mund ta marrë Jago ose Ajetovikij. 

Në orën 21:00 do të jetë radha e Dinamos që në “Elbasan Arena” do të presë Pafos. Pasi eliminoi Aluminij dhe Audan, skuadra e Ilir Dajës ka shansin e artë për të arritur në fazën e Ligës në Conference League dhe vetëm qipriotët e Pafos janë pengesa e fundit.

Ilir Daja është një trajner ekspert përsa iu përket kompeticioneve evropiane teksa në karrierën e tij ka mundur të kualifikojë Skënderbeun dhe  Ballkanin në fazën e grupeve të kompeticionve të UEFA, do ta ndihmojë edhe me Dinamon me synimin që të bëjë mrekullinë edhe me skuadrën kryeqytetase.

Te Dinamo kthehet Përndreca që e shleu skualifikimin me karton të kuq, ndërkohë që Daja është në dilemë për të zgjedhur mes Ruben Silvas dhe Richards si titullarë në fushën e lojës