“Sa më shpejt të jetë e mundur”/ Gjykata Evropiane e të Drejtave të Njeriut ultimatum Turqisë: Lironi menjëherë Osman Kavalën!

ä

Gjykata Evropiane e të Drejtave të Njeriut ka urdhëruar Turqinë të lirojë sa më shpejt të jetë e mundur biznesmenin dhe aktivistin Osman Kavala, duke e cilësuar dënimin e tij me burgim të përjetshëm si të pavlefshëm. Gjykata vendosi gjithashtu që Turqia t’i paguajë Kavalës më shumë se 110 mijë euro. Kavala, i cili është bërë simbol i goditjes ndaj shoqërisë civile në Turqi, u arrestua në tetor 2017 dhe prej atëherë ndodhet në burg në Stamboll. Ai u ndoq fillimisht për rolin e pretenduar në protestat e Parkut Gezi të vitit 2013 kundër qeverisë së Recep Tayyip Erdoganit.

Pavarësisht se Gjykata e Strasburgut kishte kërkuar më herët lirimin e tij dhe ai ishte liruar nga akuzat në vitin 2020, Kavala u arrestua sërish menjëherë me akuza të tjera. Në vitin 2022 ai u dënua me burgim të përjetshëm për tentativë për përmbysjen e qeverisë. Në vendimin e saj, të miratuar me 15 vota pro dhe 2 kundër, GJEDNJ vlerësoi se ndjekja penale, paraburgimi dhe dënimi i Kavalës ishin motivuar kryesisht nga qëllimi për ta ndëshkuar për rolin e tij në protestat e Parkut Gezi dhe për aktivitetin e tij si mbrojtës i të drejtave të njeriut.

Sipas Gjykatës, këto veprime synonin gjithashtu ta heshtnin Kavalën. Turqia është dënuar më herët nga Gjykata e Strasburgut për shkelje të lirisë së shprehjes, lirisë së tubimit, të drejtës për liri dhe siguri dhe të drejtës për një proces të drejtë, si dhe për trajtim çnjerëzor dhe degradues. GJEDNJ theksoi gjithashtu se refuzimi i autoriteteve turke për ta liruar Kavalën, pavarësisht vendimeve të mëparshme të Gjykatës, minon besimin e qytetarëve dhe shoqërisë te sundimi i ligjit dhe cenon rendin kushtetues. Vendimi i fundit e vendos sërish Ankaranë përballë detyrimit për të zbatuar vendimet e Gjykatës Evropiane për të Drejtat e Njeriut.