TIRANË- Kryetari i Partisë Mundësia Agron Shehaj ka reaguar pas vendimit të Sekretariatit të Etikës që vendosi përjashtimin e tij me 60 ditë nga punimet e seancave plenare. Përmes një video në rrjetet sociale, Shehaj thekson se beteja e tij në Parlament si përfaqësues i qytetarëve që e kanë votuar është një luftë që nuk do të ndalet.
Teksa thekson se pavarësisht kësaj lufte për fjalën, për kërkesën e llogarisë ndaj qeverisë me interpelanca, apo pavarësisht kërcënimeve deri tek familjarët, kreu i Mundësia shprehet se nuk do të pranojë kurrë që detyra e një deputeti ‘të jetë të ngrejë kartonin sa herë e urdhëron Edi Rama dhe Taulant Balla’.
Kreu i Partisë Mundësia i bën thirrje të gjithë qytetarëve shqiptarë që të reagojnë dhe të luftojnë për të drejtat e tyre dhe kundër pushtetarëve të korruptuar. Kjo është hera e katërt brenda pak muajve të jetës parlamentare që kryetari i Partisë Mundësia përjashtohet nga Kuvendi.
Hera e fundit erdhi pas përballjes së Shehajt dhe deputetit Erald Kapri me kryeministrin Edi Rama, të cilit i kërkoi të dëgjonte thirrjet e protestuesve që duan dorëheqjen e kësaj qeverie. Për këtë përballje u vendos përjashtimi i të dy deputetëve të Partisë Mundësia, duke shënuar herën e parë në histori që një forcë politike nuk ka mundësinë që të përfaqësojë qytetarët që e kanë votuar në Kuvend.
Më herët Shehaj ka pasur përplasje me ministrin e Financave Petrit Malaj i cili e shantazhoi kryetarin e Mundësisë me listën e kompanive të tij gjatë interpelancës për gjobën 120 mln euro të Bankers. Po ashtu Shehaj është përjashtuar edhe për përplasjen me Taulant Ballën gjatë interpelancës për banorët e Rrjollit që kërkojnë të drejtën e pronës së tyre në një tokë ku po ndërtohet një resort.
Në jetë jam mësuar të luftoj. Të luftoj për të drejtat e mia. Të luftoj për atë që besoj. Dhe sot në Parlament më duhet të luftoj. Më duhet të luftoj për të drejtën e fjalës. Më duhet të luftoj për interpelancat. Më duhet të luftoj për të marrë dosjen e Belinda Ballukut. Më duhet të luftoj për të hyrë në Parlament. Do të doja shumë që të drejtat e opozitës të respektoheshin që të mos kishte nevojë që të ngrija zërin. Por kjo është zgjidhja e vetme që më ka mbetur. Në fund të fundit, të gjithë ne duhet të mësojmë që duhet të luftojmë për të drejtat tona. Nëse shqiptarët nuk kanë të drejtën e një shëndetësie falas, nuk kanë të drejtën e pronës, nuk kanë të drejtën e zhvillimit të biznesit të tyre në Shqipëri, është sepse mbase duhet të kishim luftuar më shumë për të drejtat tona. Askush nuk ka për të na falur asgjë. Këta pushtetarë të korruptuar që iu kanë nxirë jetën shqiptarëve në këto 35 vjet e kanë bërë sepse nuk kemi luftuar mjaftueshëm, nuk kemi reaguar mjaftueshëm. Dhe këtë kam ndërmend të bëj. Do të vazhdoj të luftoj! Nuk ndalem.
