Katërvjeçari i fundit i qeverisë “Rama 2”, me shumë gjasa nuk do jetë lufta kundër informalitetit, por vënia në funksion e gjithë strukturave të shtetit, të cilët do bëjnë kontrolle formaliteti, që ti japin “një dorë” biznesmenëve që fitojnë miliarda në vit. Këtë nuk e themi ne, këtë e tha ai vetë publikisht.
Shqetësimi i kryeministrit Edi Rama, nisi pasi konstatoi se miliarderët më të mëdhenjtë të vendit janë prekur nga “kriza e madhe”, përfundim të cilin e arriti pasi zbuloi, se “oligarkët” nuk po organizojnë më asnjë festë, nuk po hedhin më asnjë fishekzjarre, por vetëm po ankohen prej banditëve me shapka, çanta dhe kapele, pra punonjësit e doganave, tatimeve, inspektoriateve, etj, që për katër vjet janë administruar nga vetë ai. Rama vdes për festa dhe kur kuptoi se oligarkët nuk e ftonin më, ai u bë xhind.
Mendimi i parë që i erdhi në mend ishte ti ftonte vetë të gjithë biznesmenët në kryeministri, tu shtroi një gosti, tu bëj presion strukturave mbikqyrëse, që të mos guxojnë kurrsesi t’i trokasin në derë, se do kenë punë me të. Por që t’ju a thjeshtonte akoma më shumë punën miliarderëve, e mos t’i prishej terezia fare, Rama vuri në dispozicion Mon Kukaleshin.
Për çdo hall e çdo problem u tha kryeministri biznesmenëve: “Çdo ministër do të ngrejë telefonin, duke filluar nga ministri i financave (Arben Ahmetaj), që duhet të jetë në dispozicionin tuaj.”
E që e gjithë ftesa të ishte më e besueshme, Rama ftoi biznesmenët VIP: “Me shpenzimet tona, kemi organizuar edhe një koktejl duke qenë se ju kohët e fundit nuk keni bërë koktejle, se keni pasur probleme financiare, ndaj jeni të ftuar ta shijoni bashkë me ne.”
Por kryeministri duhet të jetë pak i sinqertë me fjalët: Me “shpenzimet tona…”, sepse shpenzimet nuk ishin aspak të tij, sepse për koktejlin nuk pagoi Rama, por gostia u shtrua sërish pa miratim nga taksapaguesit shqiptarë, shumë prej të cilëve nga varfëria as që e njohin fjalën “koktejl”.
Natyrisht oligarkëve të koktejlit të përballur me “vështirësi” financiare, as që u bie ndërmend se kush i paguan banketet dhe ahengjet, deria sa të kenë qeverinë që i mbështet dhe i ndihmon me miliarda, që edhe këpucët e shtrenjta të mos prekin baltë kur të hedhin këmbët në trojet e falura.
Fjala me “shpenzimet tona”, është çelsi magjik që përdor kryeministri duke futur tek “tonat” qeverinë, popullin dhe oligarkinë, pra shpenzimet janë gjithmonë “tonat”. Kjo ishte edhe arsyeja që kryeministri fal e dorovit pa i’u dridhur syri.
I ftuari më i rëndësishëm, Samir Mane, zotërues i kompanisë Balfin Group, e ka kuptuar më mirë se cilido, se çfarë donte të thoshte kryeministri me “vështirësi financiare”, duke i kujtuar paratë dhuratë nga qeveria nëpërmjet FZHZH-së dhe bekimin e tij.
Sa për dijeni të taksa paguesve shqiptarë, që ndoshta pak ose aspak nuk e dinë, në muajin korrik, Fondi Shqiptar i Zhvillimit (FSHZH), një institucion shtetëror bordi i të cilit është plotësisht nën kontrollin e qeverisë, i dha Manes, njërit prej oligarkëve të kudondodhur i parave tona, një fond prej 1.2 miliard lekësh për rikonstruksionin e rrugës që të çon tek fshati i tij privat “Green Coast”, i projektuar me vila, për blerës miliarder në zonën e Palasës.
Ky fond është një “koktejl” që qeveria i’a shtroi vetëm para pak muajsh miliarderit Samir Mane, që sigurisht edhe një herë do të paguhet nga xhepi jonë, ndërsa zona e zaptuar prej tij do mbetet një kujtim i largët për shqiptarët, si një prej plazheve publike më të bukur të rivierës Shqiptare.
Por pas gjithë këtyre bëmave ka diçka që të shokon: Mos vallë banketi u shtrua për t’u thënë Vipave, se tani që jeni në “vështirësi” nuk është nevoja të paguajnë asgjë, e nëqoftëse shteti i’u vjen tek dera e biznesit rriheni dhe përzejeni. Apo për t’ua përsëritur se shteti jam unë, thesi jam unë dora vetë dhe i vetëm?! Qoftë larg, por më duket sikur kjo histori është prapa derës!
Më keqardhje, por tashmë shqiptarët po binden se Rama nuk ndryshon shumë nga ish miku i tij Ilir Meta, vetëm është pak më tepër qejfli festash, e për një copë “ftesë”, ai ka për borxh tu fali oligarkëve gjithë Shqipërinë, sigurisht në kurriz të shqiptarëve, jo të xhepit të tij!/Pamfleti.com
