TIRANA- Ndryshe nga sa ka ndodhur me projektet e tjera të zhvillimit të pronës me privatin, duket se projekti që lidhet me Bibliotekën e re Kombëtare në këmbim të pronave tek ish-vilat gjermane nuk po arrin të zgjojë interes për bashkëpunim. Korporata e Investimeve Shqiptare njoftoi se procedura e shpallur në nënprojektin “:Godina e re e Bibliotekës Kombëtare” nën titullin e kontratës “Zhvillimi multi-funksional në rrugën “Gramoz Pashko”, Tiranë (ish-“vilat gjermane”)” ka pasur interes të pamjaftueshëm për ta përfunduar atë me sukses.
“Ky Njoftim ju komunikon vendimin e Korporatës për anulimin e procedurës konkurruese të nisur më 13 Mars 2025 për përzgjedhjen e një Partneri Privat për zbatimin e kontratës “Zhvillimi multi-funksional në rrugën “Gramoz Pashko”, Tiranë (ish-“vilat gjermane”)”, si pjesë e Nën-projektit të Investimit “Godina e re e Bibliotekës Kombëtare”.
Arsyeja për anulim është: numri i pamjaftueshëm i aplikimeve të dorëzuara për Fazën I të procedurës konkurruese brenda afatit për dorëzimin e aplikimeve të përcaktuar në Dokumentin e Kualifikimit” thuhet në njoftimin e fundit të anulimit të bashkangjitur në thirrjen tashmë të mbyllur.
Procedura për një Bibliotekë të re nën një model që po zhvillohet në disa projekte në vend nisi në fillim të këtij viti pas transferimit të disa pronave te Korporata e Investimeve Shqiptare nga ana e Këshillit të Ministrave. Kjo e fundit do të zërë vend në disa prona në rrugën “Gramoz Pashko” në afërsi të Qytetit Studenti, me një sipërfaqe trualli prej 27 mijë m2.
Thirrja e shpallur kërkonte që privatët e interesuar për të zhvilluar në partneritet këto prona shtetërore të dorëzonin projekte potenciale që do të kalonin në disa faza.
Pronat e vënë në dispozicion janë në një zonë të Tiranës e njohur si ish-Vilat Gjermane, ndërkohë që vendimi që transferonte tek Korporata këto prona parashikon disa nënprojekte të tilla si “Copëzat”, “Hospitality” dhe “Godina e re e Bibliotekës Kombëtare”.
“Ky projekt investimi synon konceptimin dhe projektimin e një zhvillimi shumëfunksional në zonën e ish-‘Vilave gjermane’, një lokacion i rëndësishëm në kryeqytet, i njohur për urbanizimin dinamik dhe afërsinë me një numër destinacionesh dhe nyjesh kryesore në zonën urbane përreth tij, duke e kthyer në një qendër shumëfunksionale për të rritur efikasitetin funksional dhe për të kontribuuar në vlerë të shtuar në jetën sociale dhe në ekonominë të qytetit të Tiranës.
Projekti i investimit realizohet nëpërmjet një modeli partneriteti, ku Korporata ka rolin e zhvilluesit të pronave shtetërore në pronësi të saj dhe ndërmjetësuesit midis institucionit publik, që ka interes të zhvillojë pronën e tij dhe të përfitojë një bibliotekë bashkëkohore dhe partnerit privat, që posedon burimet financiare, njerëzore dhe ekzekutive dhe ka interes në realizimin e projektit të investimit”, – thuhej në shpalljen e Korporatës./ Monitor
