Zbardhet operacioni antidrogë në Shqipëri, Itali e Spanjë/ Europol zbardh skemën: 28 të arrestuar, ja roli i grupit të shqiptarëve

Një operacion i përbashkët ndërkombëtar, i zhvilluar më 8 korrik 2025 në Itali, Spanjë dhe Shqipëri, ka rezultuar në arrestimin e 28 personave të dyshuar si pjesë e organizatës kriminale Ndrangheta. Operacioni është zhvilluar me mbështetjen e Europolit, duke përfshirë ekipe speciale të ndërhyrjes, që synuan një rrjet të gjerë kriminal me shtetas italianë dhe shqiptarë.

Mes të arrestuarve është edhe një shtetas italian nga Kalabria, i dyshuar si themelues i një strukture kriminale për trafik kokaine në zonën e San Basilios, Romë. Ai dhe tre djemtë e tij dyshohet se kanë bashkëpunuar ngushtë me një grup shqiptar, që kishte rol logjistik në trafikun e drogës, duke organizuar transportin e ngarkesave nga portet e Spanjës dhe Holandës drejt Italisë dhe shpërndarjen e mëtejshme në kryeqytet.

Sipas hetimeve, rrjeti dyshohet se ka trafikuar të paktën 1019 kilogramë kokainë dhe 1497 kilogramë hashash, në mbi 80 operacione. Lënda narkotike dyshohet se është blerë në Amerikën e Jugut dhe është futur në Evropë përmes porteve si Gioia Tauro, me ndihmën e ndërmjetësve kriminalë kalabrezë.

Dhunë dhe tortura për të ruajtur kontrollin

Gjatë operacionit, hetuesit kanë dokumentuar raste të dhunës ekstreme brenda rrjetit kriminal. Katër persona italianë dyshohet se kanë rrëmbyer dhe torturuar një trafikant droge, në përpjekje për të mbjellë frikë dhe për të forcuar disiplinën mes anëtarëve. Video e dhunës, e filmuar me telefon, është shpërndarë për të nënshtruar pjesëtarët e tjerë të grupit.

Gjithashtu, hetimi ka zbuluar përdorimin e teknologjisë së avancuar për komunikim të fshehtë. Anëtarët e grupit përdornin mesazhe të koduara, përmes pajisjeve të siguruara nga një rrjet kriminal shqiptar, ndërsa personi përgjegjës për këto pajisje u arrestua gjatë operacionit.

Roli i Europolit dhe bashkëpunimi ndërkombëtar

Europoli ka luajtur një rol kyç në këtë operacion të suksesshëm, duke dërguar një ekspert në Itali dhe duke përdorur njësinë e tij të lëvizshme për krahasimin e të dhënave në kohë reale. Agjencia ndihmoi në analizat financiare dhe në shkëmbimin e informacionit mes autoriteteve italiane dhe spanjolle, çka çoi edhe në pesë arrestime të tjera në Spanjë, përpara ditës së operacionit.