U bllokuan para pak ditësh, hidhen në erë me shpërthim të kontrolluar 3 vilat luksoze në Sauk! Rama ndan PAMJET: Kishin qëllime fitimi në dëm të ligjit...

TIRANA- Një bllok vilash 2-3 katëshe në ndërtim në zonën e Farkës në Tiranë u shemb sot me anë të një shpërthimi të kontrolluar. Vilat ishin ndërtuar në shkelje të lejeve ndërtimore dhe ishin vendosur nën sekuestro më 4 nëntor, pas një inspektimi në terren të ministres së Brendshme, Albana Koçiu, e shoqëruar nga drejtori i Policisë së Shtetit, Ilir Proda.

Nga hetimet rezulton se në këtë rast janë përfshirë 14 persona, nga të cilët 6 janë ende në kërkim. Pronarja e “Austrian Construction Albania”, Elga Kosta, 55 vjeç, administratori Stavro Suloti dhe arkitektja e projektit akuzohen për ndërtim të paligjshëm dhe janë shpallur në kërkim. Ndërkohë, në pranga kanë rënë inspektorët e IMT-së Gjergji Male, Krenar Rexhepi, Aldo Dubi, Odise Cenaj dhe Endri Dervishi.

Gjithashtu, nën hetim për të njëjtën vepër penale është një inspektore 35-vjeçare, ndërsa tre kolegë të saj janë shpallur në kërkim. Prangat i kanë kapur edhe Bianka Xhumari, 35 vjeç, drejtuese teknike e punimeve, dhe Ritvan Gjikolaj, 36 vjeç, inxhinier i kompanisë. Policia njofton se inspektorët, me mosveprimet dhe veprimet e tyre, kanë lejuar ndërtimin pa leje të tre banesave në një zonë rezidenciale.

Kryeministri ka publikuar videon e shembjes dhe shkruan se nuk mund të ndërtohen vila të shtrenjta në kurriz të komunitetit.

“Nuk mund të ndërtohen vila të shtrenjta për qëllime fitimi në dëm të ligjit e në kurriz të komunitetit. Operacioni nuk do të ndalet askund dhe përballë askujt, deri kur asnjë të mos e mendojë fare më se mund të ndërtojë metra katrorë pa leje”, shkruan Rama.