Rregullorja për celularët në GJKKO, Maks Haxhia: Nuk na kanë kthyer përgjigje, mungesë respekti institucional

TIRANË- Kreu i Dhomës Kombëtare të Avokatisë, Maks Haxhia, ka kundërshtuar rregulloren e re të Gjykatës së Posaçme, e cila ndalon përdorimin e celularëve gjatë seancave gjyqësore. Haxhia bëri të ditur se avokatët i kanë dërguar zyrtarisht GJKKO-së një kërkesë për rishikimin e kësaj mase, por deri më 8 shtator nuk kanë marrë asnjë përgjigje nga gjykata.

Sipas tij, rregullorja është në kundërshtim me Konventën Europiane të të Drejtave të Njeriut, praktikën e Gjykatës Europiane të të Drejtave të Njeriut në Strasburg, si dhe me Kodin e Procedurës Penale. Ai theksoi se kërkesa drejtuar GJKKO-së synon rishikimin e rregullores, ndërsa kritikoi institucionin për mungesën e një përgjigjeje, qoftë edhe për konfirmimin e marrjes së kërkesës.

Haxhia e cilësoi këtë situatë si mungesë respekti institucional ndaj avokatëve dhe tha se ajo konfirmon, sipas tij, problematikat që hasin avokatët gjatë ushtrimit të profesionit. Në lidhje me këtë çështje, kreu i Dhomës Kombëtare të Avokatisë tha gjithashtu se i ka kërkuar një takim urgjent kreut të Këshillit të Lartë Gjyqësor, për të diskutuar rregulloren dhe pasojat e saj për ushtrimin e profesionit të avokatit.

Sipas Haxhisë, atij i është komunikuar se KLGJ-ja nuk do të mblidhet para datës 15 shtator. Megjithatë, ai tha se do të vijojë të insistojë për zhvillimin e një takimi urgjent.

“Me t’u përballur me këtë rregullore, kryetari i Dhomës, së bashku me kryetarin e Dhomës së Tiranës, kemi bërë reagimin e parë në media, duke kundërshtuar rregulloren e re si një akt që bie ndesh jo vetëm me Konventën Europiane të të Drejtave të Njeriut dhe me Strasburgun, por bie ndesh edhe me Kodin e Procedurës Penale.

I kemi dërguar letër GJKKO-së, ku i kemi kërkuar rishikimin e rregullores dhe deri më sot, që është data 8, nuk kemi asnjë reagim nga ky institucion. Të paktën të thotë që e morëm kërkesën. I kam kërkuar kreut të KLGJ-së një takim urgjent për këtë masë dhe më është komunikuar që ky Këshill nuk mblidhet para datës 15. Ne insistojmë që duhet ta bëjmë këtë takim”, deklaroi Haxhia.