"Kompetenca për t’i caktuar i takon vetëm Kuvendit"/ Ngërçi me pagat e magjistratëve, Balla tallet me opozitën: U ‘djeg barku’ për gjyqtarët, por i shajnë me “libër shtëpie”

TIRANË- Kreu i Grupit Parlamentar të PS-së, Taulant Balla, tha se çështja e pagave të magjistratëve do të shqyrtohet në Kuvend më 17 shtator. Duke folur pas mbledhjes së Konferencës së Kryetarëve, Balla ironizoi edhe opozitën, duke thënë se sot atyre “u djeg barku” për pagat e tyre, por se kur u prishen interesat magjistratët shahen me “libër shtëpie”.

Ai theksoi ndër të tjera se projektligji është depozituar brenda afatit të përcaktuar nga Kushtetuesja, ndërkohë shtoi se në një shtet demokratik kompetenca për përcaktimin e pagave i takon Kuvendit.

"Po e ushtrojmë përgjegjësinë që na takon. Kemi parashikuar shqyrtimin dhe miratimin e këtij projektligji në datën 17 shtator. Në demokraci, secili ka këndvështrimin e vet, jurisprudenca nuk është ekzakte. Projektligji është depozituar brenda afatit të caktuar nga Kushtetuesja dhe do të shqyrtohet me prioritet. Është një projektligj që nuk shqyrtohet me procedurë të përshpejtuar. Atyre që iu djeg barku, që kur iu teket shkojnë e shajnë me libër shtëpie prokurorë dhe gjyqtarë dhe sot mendojnë se duhet të mbështesin pagat e gjyqtarëve... Si qytetar mendoj se, në një shtet demokratik, me ndarje të pushteteve, kompetenca për caktimin e pagave është vetëm e Kuvendit. Prisni të flasë Kuvendi”, tha Balla.