ITALI- Një shpërthim me lëndë plasëse është parandaluar pranë banesës së familjarëve të bosit shqiptarë të drogës, Elvis Demçes. Mësohet se një mjet shpërthyes artizanal ishte vendosur pranë banesës ku jetojnë edhe fëmijët e shqiptarit. "La Repubblica" shkruan se kjo nuk është vetëm një paralajmërim por shenjë se tashmë armëpushimi ka përfunduar.
Ngjarja ndodhi më 15 korrik, një ditë pas operacionit të Njësisë Hetimore të Karabinierëve pasi zbuluan se Demçe jepte urdhra për rrëmbime personash me qëllim marrjen e informacioneve mbi një ish-partner të kthyer në rival, Fabrizio Fabietti. Për të realizuar këtë, ai mbështetej te një grup i përzier latino-amerikanësh dhe shqiptarësh, të njëjtët që më 11 maj 2024 tentuan të vrisnin shefin e trafikut në zonën e Tor Bella Monaca, Giancarlo Tei.
Dy muaj më vonë, një bombë shpërtheu në një apartament në Borghesiana, ku banonte një i dënuar tunizian i lidhur me grupet shqiptare. Ndërsa këto ngjarje fillojnë pak nga pak të lidhen me njëra-tjetrën media italiane se këto raste tregojnë për një përplasje të vjetër mes grupit kriminal të Ponte Milvio.
Fillimisht u publikuan lajmet për hetimet mbi Demçen dhe urdhrat e tij nga burgu. Vetëm një ditë më pas shpërtheu bomba, e hedhur para portës së banesës, me një fitil që për fat nuk funksionoi siç duhej. Ishte gruaja e Demçes që e gjeti.
Demçe ka më shumë se një armik, aq sa edhe planet që ka ndërtuar. Lista e armiqve nuk përfundon me Molisso. Aty përfshihen edhe Leandro Bennato dhe Ermal Arapaj, edhe ky shqiptar, sot armik i Demçes. Disa vite më parë, ata përplaseshin për kontrollin e pikave të drogës, me bomba dhe armë. Pastaj erdhën arrestimet. Por tani, zjarri po rindez flakët e vjetra nën hi.
Më 28 maj të këtij viti, Elvis Demçe u dënua me 15 vite burg. Demçe, i cili është i njohur edhe për deklaratën e tij: “Unë jam Zoti”, kishte lidhje me krimin e organizuar ndërkombëtar, përfshirë ‘Ndrangheta-n, trafikantë kolumbianë dhe zyrtarë të korruptuar në porte. Ai planifikoi edhe eliminimin e rivalit të tij Ermal Arapajt me një atentat në Lanuvio, i cili dështoi më 9 korrik 2020, duke çuar në një shkëmbim zjarri. Më 5 shtator, njerëzit e Demçes i vunë flakën vilës dhe makinës së Arapaj në Velletri. Ndaj Demçes vijojnë edhe procese të tjera, dhe ai ka tentuar të shmangë burgun duke paraqitur certifikata mjekësore me pretendimin se është i varur nga droga një strategji që drejtësia italiane pritet ta shqyrtojë në vijim.
