Në 12 maj dita e provës në BE. A do ta kalojë Shqipëria raportin IBAR?

 

BRUKSEL- Shqipëria përballet me një moment kyç në rrugën e saj drejt integrimit europian, teksa disa vende anëtare të Bashkimi Evropian vijojnë të mbajnë pezull miratimin e raportit të ndërmjetëm IBAR. Burime për Dosja.al, bëjnë me dije se në këtë klimë pasigurie, kryenegociatorja shqiptare, Majlinda Dhuka ka telefonuar ditën e djeshme shefen e presidencës qipriote, Marilena Raouna, për të diskutuar hapat e mëtejshëm në kushtet kur disa shtete anëtare të BE-së po mbajnë pezull miratimin e raportit IBAR që përfshin respektimin e standarteve për funksionimin e shtetit ligjor dhe pavarësisë së gjyqësorit.

Raporti IBAR për Shqipërinë ka evidentuar rreth 92 piketa që lidhen kryesisht me forcimin e shtetit ligjor dhe garantimin e pavarësisë së gjyqësorit, të cilat janë kushte thelbësore për avancimin në negociata. Ndryshe nga Mali i Zi, i cili mori dritën jeshile në mars, Shqipëria po përballet me rezistencë nga disa shtete anëtare, mes tyre edhe Gjermania. Për pasojë, Konferenca Ndërqeveritare e planifikuar për muajin prill, ku pritej të niste mbyllja e kapitujve të parë, u shty për shkak të mungesës së konsensusit.

Burime diplomatike në Bruksel bëjnë me dije se ekziston një mundësi reale që vendimmarrja të zvarritet deri në fund të vitit 2026. Një nga shqetësimet e ngritura lidhet me perceptimin për pavarësinë e drejtësisë në vend. Në këtë kuadër, qëndrimi i qeverisë së Edi Rama ndaj hetimit të SPAK për ish-zëvendëskryeministren Belinda Balluku është parë nga disa vende kyçe si një sinjal negativ, duke ndikuar në diskutimet brenda strukturave të BE-së për miratimin e raportit.

Megjithatë, në prapaskenë po zhvillohen përpjekje intensive diplomatike që IBAR të miratohet brenda muajve maj ose qershor, me synimin për të shmangur një shtyrje të gjatë të procesit dhe për të mbajtur të hapur perspektivën europiane të vendit. Mbledhja e radhës është planifikuar për tu mbajtur më 12 maj por ende ka mungesë konsensusi në lidhje me raportin IBAR