TIRANË- Gjykata e Posaçme ka caktuar dje masat e sigurisë për të arrestuarit në kuadër të operacionit të SPAK pak ditë më parë, ku u godit organizata kriminale e Çopjave.
GJKKO vendosi “arrest në burg” për Ervis Çelën, Albin Çelën alias Defrim Çela, Petrit Lakatosin alias Petrit Sulejmani, Renato Musakun, Gert Çermajn, Marenglen Kamamin, Elidon Çelën. Ndërkohë që u la në fuqi masa e sigurisë “detyrim paraqitje” ndaj dy të akuzuarve të tjerë, Kujtim Gjyla dhe Ditjon Pepa.
Ky grup kriminal akuzohet nga SPAK se trafikonte drogë nga Amerika drejt vendeve të Evropës perëndimore. Konkretisht, SPAK po heton: 11.6 ton kokainë të transportuar nga Paraguaji në Belgjikë (në portin e Anversit), dhe 16.4 ton të tjera nga Paraguaji në Gjermani (në Hamburg).
Ditën e sotme, Euronews Albania ka publikuar pjesë nga dosja e hetimeve të SPAK, të cilat kanë nisur që në vitin 2023. Në dosjet përfshihen emrat e dy shqiptarëve që në vitin 2020 dhe arrestuan në një apartament në Holandë me 600 kg kokainë dhe 2 milionë euro cash.
Fadil Balla dhe bashkëpunëtorët e tij, Miklovan Mullaj, e kanë tërhequr sasinë e lëndës narkotike nga magazina e Franc Gergelit më datë 07.11.2020. Personat që ka dërguar Miklovan Mullaj për të marrë lëndën narkotike kanë qenë Muharrem Daja dhe Nilson Bakiu (Nasufi). Daja dhe Bakiu e kanë magazinuar lëndën narkotike në adresat me numër 737 në Strevelseeg në Roterdam dhe banesën Nr. 176 në rrugën Hilleeeg në Roterdam. Rreth orës 22:50, Policia e Rotterdamit, e cila kishte që në muajin shtator 2020 që vëzhgonte banesën e Bakiut dhe Dajës në Strevelseeg, ka ushtruar kontroll në të dyja banesat dhe ka sekuestruar 600 kg lëndë narkotike kokainë dhe ka arrestuar shtetasit Muharrem Daja dhe Nilson Bakiu, të cilët janë dënuar me nga 5 vite burgim në prill të vitit 2021 për veprën penale të kryerjes në bashkëpunim të veprimeve në kundërshtim me ligjin për drogërat.
Më tej në dosje hetimore janë dhe qindra mijëra sms të zbërthyera nga aplikacioni SKY ECC dhe komunikimet e trafikantëve. Nga komunikimet dyshohet se grupi kriminal ka bashkëpunuar edhe me një shtetas brazilian si dhe në një rast ka trafikuar edhe armë zjarri.
Kam shumë lek në Holandë, s’po i nis dot. Nga konteksti i bisedës dyshohet se me nofkën “shijaksi”, Ervis Cela i referohet shtetasit Fadil Balla, për të cilin pyet vëllain tij nëse ka dorëzuar ndonjë shumë parash. Të njëjtën pyetje ka dhe për shtetasin Soni Pepa, të cilit i referohet me nofkën “Zhuu”. Ervisi pyet vëllain e tij nëse tashmë e ka grumbulluar shumën e dyshuar prej 15 milionë eurosh. Në këtë bisedë Ervis Çela shprehet gjithashtu se ka shuma të konsiderueshme parash në Holandë, por nuk ka shoferë për t’i transportuar deri në Shqipëri.
Më datë 10.09.2020, ora 15:21:33, Ervis Çela komunikon me Fadil Ballën të cilit i shkruan “Me ke nja 600 S më shumë iani… A më the fut 110 copa… Dhe un i futa… Sta prish qefin” dhe në vijim i dërgon një fotografi me shënime detyrimesh. Ervisi vijon bisedën duke i dërguar mesazhet me tekst “Ti s’ke më shtëpi ku me fli lekët… Ahahahahaha. Janë mush plot…
Më datë 16.09.2020, në orën 13:22:32 Ervis Cela komunikon me Franc Gergelin të cilit pasi i dërgon disa fotografi armësh zjarri automatike me silenciator të montuara i shkruan “6 janë me silenciator.. do çmontohen tani dhe i fus në kanaçe, çdo armë kanaçe.
