"Jam demokrate, por nuk jam me PD"/ U emërua në krye të AKT, Jola Hysaj zbulon bisedën me kryeministrin Rama

 

TIRANË- Ish-sekretarja për Marrëdhëniet me Publikun në Partinë Demokratike, Jola Hysaj, ka reaguar pas emërimit të saj në postin e drejtoreshës së Agjencisë Kombëtare të Turizmit. Me anë të një reagimi në rrjetet sociale, Hysaj konfirmon marrjen e detyrës, duke iu përgjigjur pyetjeve të shumta që, sipas saj, kishte marrë nga miq dhe të njohur.

Në postimin e saj, Hysaj shprehet mirënjohëse për besimin e dhënë, ndërkohë thekson se synimi i saj është të justifikojë plotësisht këtë përgjegjësi të re. Ajo konfirmon gjithashtu se është takuar me kryeministrin Edi Rama, duke zbuluar edhe mesazhin që i ka mbetur më shumë në mendje nga biseda mes tyre.

Hysa sqaron edhe qëndrimin e saj politik, duke theksuar se mbetet demokrate, por se nuk është pjesë e Partisë Demokratike. Në fund të reagimit të saj, Hysaj u bën thirrje qytetarëve të respektojnë zgjedhjen e saj profesionale, teksa shton se është e vetëdijshme për komentet dhe spekulimet që mund të qarkullojnë.

Postimi i plotë i Jola Hysës:

Përshëndetje, meqë kam marrë shumë pyetje në ëhatsapp nga miq ja përgjigja ime. Po jam emëruar drejtore e Agjencisë Kombëtare të Turizmit. Jam shumë falenderuese për besimin dhe uroj ta justifikoj plotësisht. Po e kam takuar Edi Ramën. Fjala që më mbeti në mend ishte: Nuk dua të bëhesh socialiste, dua të çosh më lart institucionin që ngriti Zana Çela. Po jam demokrate, por nuk jam me Partinë Demokratike. Jam me partinë e Shqipërisë turistike. Uroj të respektoni lirinë dhe zgjedhjen time për të bërë një punë të re në një sektor ku kam punuar shumë vite. Gjithkush është i lirë të spekullojë dhe thurrë teori konspirative. Por kush më njeh e di që unë i pres drutë shkurt. Kaq kisha nga ana ime. Kush do më urojë punë të mbarë e falenderoj! Kush do më shajë dhe mallkojë e ngushëlloj.