Divjaka në protestë për të 37-tën ditë, banorët kundër Reformës Territoriale: Bashkia jonë duhet të fuqizohet, jo të shkrihet

DIVJAKË- Banorët e Divjakës janë ngritur për të 37-tën ditë në protestë kundër shkrirjes së Bashkisë Divjakë dhe bashkimit të saj me Bashkinë Lushnjë. Qytetarët u mblodhën sërish në sheshin kryesor të Divjakës, ku përsëritën kundërshtimin e tyre ndaj ndryshimit të statusit të bashkisë.

Protestuesit kërkuan llogari nga deputetët dhe kryeministri, duke theksuar se Divjaka nuk duhet të mbetet pa një institucion të rëndësishëm vendor. Gjatë protestës, banorët deklaruan se nuk mjafton vetëm të kundërshtohet shkrirja e bashkisë, por duhet të punohet për zhvillimin dhe fuqizimin e saj.

Kritikat e banorëve u drejtuan edhe ndaj kryeministrit, të cilin një prej protestuesve e akuzoi se po rëndon më tej situatën e qytetarëve të Divjakës dhe po nxit largimin e të rinjve nga zona. Banorët kanë paralajmëruar gjithashtu vijimin e protestave, duke kërkuar që zëri i tyre të merret në konsideratë përpara çdo vendimi për riorganizimin territorial të zonës.

“Kjo bashki e vogël si e Divjakës, por me njerëz të mëdhenj, me dinjitet, që deri më sot i ka përmbushur detyrat e saj dhe ne duam me gjithë zemër të vazhdojmë dhe ta zhvillojmë dhe të fuqizohet më tepër. Kryeministri ia ka shtuar hallet qytetarit të Divjakës. Kërkon të shpopullojë të gjithë Shqipërinë. Është faj që të ikin djemtë nga Divjaka, të emigrojnë dhe të lënë tokën e tyre. Është injorancë dhe pabesi. Divjakës nuk i ke ngulur thikën pas shpine por vetvetes," tha një qytetar.