Akuzohet për pastrim parash dhe pjesëmarrje në grup kriminal/ U arrestua pak ditë më parë në Greqi, Ilir Shtufi refuzon depërtimin drejt Shqipërisë

GREQI- Biznesmeni Ilir Shtufi, ndaj të cilit SPAK kishte lëshuar një urdhër-arrest është arrestuar më 12 qershor në Greqi. Pas kësaj ai është dërguar në Prokurorinë e Apelit të Selanikut dhe është vendosur që të mbetet në paraburgim derisa këshilli kompetent të vendosë mbi kërkesën për depërtimin e tij në Shqipëri. Mediat greke shkruajnë se ai është shprehur se nuk dëshiron të depërtohet në Shqipëri, ndërsa ka mohur edhe akuzat. 

"53-vjeçari u arrestua në zbatim të Njoftimit të Kuq të Kërkimit Ndërkombëtar që ishte në pritje ndaj tij nga autoritetet shqiptare, të cilat kërkojnë arrestimin dhe ekstradimin e tij për veprat penale që dyshohet se janë kryer në vitin 2020 në Tiranë dhe konkretisht për "pastrim parash të kryer duke përfshirë fonde të nxjerra nga trafiku i drogës, pjesëmarrje në një organizatë të strukturuar kriminale dhe kryerje të veprave penale nga një organizatë kriminale dhe grupe të strukturuara kriminale", shkruan media greke.

SPAK ka goditur disa ditë me parë një rrjet ndërkombëtar të trafikimit të kokainës, duke lëshuar 20 masa sigurie ndaj disa biznesmenëve që akuzohen për pastrim parash si dhe ka vendosur sekuestro mbi pasuritë e tyre. Mes personave të shpallur në kërkim ishte edhe Ilir Shtufi, i cili akuzohet për pastrim parash, ndërsa ka qenë aktiv edhe në fushën e ndërtimit. 

Dyshohet se Ilir Shtufi bashkëpunonte me një grup të trafikut të lëndëve narkotike, i cili drejtohej nga dy vëllezërit Koçeku nga Kamza, duke iu pastruar paratë e fituara nga trafiku i drogës. Grupi kriminal trafikonte kokainë nga Kolumbia, Ekuadori, Bolivia, Surinam, Paraguai, Uruguai, Porto-Riko e Brazil drejt Europës.

Pjesë e grupit kriminal janë: Ardian Zykaj, Alfredo Hamzai, Adrian Rama, Erjon Rama, Orgest Bircaj, Orest Sota, Elton Memeti Artur Shehu, Leonard Bishaj, Arben Ismaili, Besnik Myftari, Dritan Aga, Luciano Koceku alias Artur Koceku, Dino alias Abedin Koceku, Ervin Koceku, Astrit Vladi, Kastriot Vladi dhe Gezim Islami.