Përmes një postimi në rrjetet sociale, Ndreu ka bërë të ditur arsyet që e kanë shtyrë të hyjë sërish në garë nën siglën e PS, duke e cilësuar rikandidimin si një përgjegjësi për të vijuar projektet e nisura dhe për të çuar më tej zhvillimin e qytetit dhe njësive administrative.
Në argumentimin e tij, kryebashkiaku ka bërë një bilanc të dy mandateve në drejtimin e bashkisë, duke krahasuar gjendjen financiare dhe infrastrukturore që, sipas tij, gjeti në vitin 2019 me situatën aktuale. Ndreu rendit mes arritjeve rritjen e buxhetit nga 12.7 milionë në 33–34 milionë euro të parashikuara për vitin 2027, shlyerjen e borxheve, rritjen e investimeve dhe ndërhyrjet në infrastrukturën rurale, turizëm, ujësjellës dhe kanalizime.
Ai thekson se mbeten ende projekte për t’u përfunduar dhe sfida për t’u përballuar, ndërsa shpreh besimin se mbështetja e qytetarëve dhe puna e skuadrës që e shoqëron do t’i japin mundësinë të vijojë drejtimin e bashkisë edhe për katër vite të tjera.
Në mesazhin e tij, Ndreu nuk ka lënë pa përmendur as kritikët, duke deklaruar se bashkia do të vijojë t’u shërbejë të gjithë qytetarëve, edhe atyre që nuk e mbështesin. Ai e mbyll postimin me një mesazh ironik për kundërshtarët: “Ata që nuk na duan, do të duhet të na durojnë edhe katër vite të tjera… duke punuar!”.
Postimi i plotë: Disa arsye dhe shumë përgjegjësi për rikandidimin më 9 maj!
Më 9 maj do të rikandidoj për një mandat të tretë në krye të Bashkisë Lezhë, sepse kemi arsye të forta për të vazhduar dhe përgjegjësi edhe më të mëdha për të përmbushur!
Mandati i parë, 2019–2023, ishte një betejë me vështirësi të jashtëzakonshme.
Trashëguam një bashki me:
- 4.6 milionë euro borxhe.
- 1200 punonjës, ku më shumë se gjysma nuk paraqiteshin në punë.
- 12.7 milionë euro buxhet, 65% e të cilit vinte nga granti i qeverisë.
- Pagesa anormale qerash.
- 67% të buxhetit për paga dhe vetëm 17% për investime.
- Situate alarmante e mbetjeve, sidomos ne bregdet.
- infrastrukture urbane dhe rurale ne gjendje te renduar.
Dhe sikur të mos mjaftonin këto, vetëm tre muaj pas marrjes së detyrës u përballëm me tërmetin, më pas me pandeminë dhe krizën e tregjeve për shkak të luftës në Ukrainë.
Por nuk u dorëzuam! Nuk u ankuam! U përballëm dhe punuam!
Sot, pas gati 8 vitesh, Lezha flet me shifra, jo me fjalë!
- Buxheti për vitin 2027 parashikohet të arrijë 33–34 milionë euro, nga 12.7 milionë që ishte në fillim. Shifër që s’ka nevojë për koment! 0 Borxhe!
- 65% e buxhetit sigurohet nga të ardhurat tona dhe vetëm 35% nga qeveria.
- 59% e buxhetit shkon për investime.
- 60% e investimeve realizohen në zonat rurale.
- Jemi ndër 4 bashkitë më të mira për projektet me donatorë.
- Mbi 250 km rrugë rurale, përfshirë projektet në vazhdim.
- Ndër bashkitë më të mira në vend për menaxhimin e mbetjeve.
- Hapa cilësorë në turizëm, sport, çështje sociale, art, kulturë dhe trashëgimi kulturore.
- Përmirësime të rëndësishme në ujësjellës, kanalizime dhe në 900 km kanale ujitëse e kulluese.
Nga një bashki që mezi përballonte shpenzimet, në një bashki që investon, zhvillohet dhe projekton të ardhmen!
Nuk po zgjatem më shumë. Nuk pretendoj se kemi bërë gjithçka dhe as se gjithçka është perfekte. Por kush e njeh Lezhën e vitit 2019 dhe sheh Lezhën e sotme, e kupton ndryshimin!
Kemi ende shumë për të bërë! Kemi projekte të mëdha në zbatim, punë të nisura që duhen përfunduar dhe sfida të reja që kërkojnë përkushtim e përgjegjësi.
Dhe mbi të gjitha, kemi një skuadër të jashtëzakonshme djemsh e vajzash lezhjanë, socialistë, demokratë e pa parti, që punojnë së bashku me një përkushtim të pashoq. Kjo është forca jonë!
E di që ka shumë që nuk na pëlqejnë. Por ka edhe më shumë që na besojnë, na mbështesin dhe na japin forcë të ecim përpara!
Pikërisht këtij besimi i detyrohemi më shumë punë, më shumë rezultate dhe më shumë përgjegjësi!
Mandati i tretë nuk është kërkesë për një privilegj. Është angazhim për të përfunduar atë që kemi nisur dhe për ta çuar Lezhën edhe më përpara!
Ne do të vazhdojmë t’u shërbejmë të gjithëve, edhe atyre që nuk na duan. Sepse Bashkia është e të gjithëve dhe puna jonë u përket të gjithëve!
Ndërsa ata që nuk na duan, do të duhet të na durojnë edhe katër vite të tjera… duke punuar!
Më 9 maj, le të flasin qytetarët! Ne kemi çfarë të tregojmë dhe dimë çfarë kemi ende për të bërë!
