Kapri: Mes Bashkisë së Himarës dhe eurodeputetit, Beleri zgjedh të jetë kryebashkiak

 

Gazetari Erald Kapri tha se nëse do të pyetej Beleri se kë do të zgjidhte Himarën apo Parlamentin Europian, atëherë do të zgjidhte pikërisht pozicionin e Kryebashkiakut të Himarës.

“Beleri do të presë vendimin e Apelit, nëse merr pafajësinë në këtë Gjykatë, atëherë ai mund të zgjedhë mes postit të kryebashkiakut dhe europarlamentarit. Mendoj se do të zgjidhte pozicionin e Kryetarit të Bashkisë së Himarës, pasi edhe eurodeputet u votua nga grekët si kryebashkiak i burgosur i Himarës”, tha Kapri në emisionin “Open” në News24.

Ai u shpreh se Bashkimi Europian ka mbajtur një qëndrim lidhur me çështjen Beleri duke u shprehur se do të presin fjalën e drejtësisë. Sipas tij, nisur nga ky qëndrim, nuk besonte se BE do të kishte tjetër reagim ndaj Belerit, meqë ai është zgjedhur europarlamentar.

Ai tha se Edi Rama i krijoi shansin e jetës Fredi Belerit duke e kthyer në hero. “Beleri pëlqehet shumë nga ekstremi i djathtë në Greqi dhe Kryeministri grek përfitoi nga kjo, duke e vendosur në listën e eurodeputetëve”, tha Kapri, duke shtuar se ai u kthye në një hero nga qytetarët grekë, pasi u shfaq si viktimë e një Kryeministri në Shqipëri.

Kapri tha se ndjehet i shqetësuar nga fakti se ai flet për vjedhjen e pronave greke në Himarë, ndërkohë që atje vidhen pronat e të gjithëve dhe s’ka lidhje me pronat e grekëve, sikundër shprehet apo e trajton Fredi Beleri.

“Personazhin Fredi Beleri në PE e kemi peshqesh nga Edi Rama”, tha Kapri.