Të paktën 34 persona kanë vdekur në Misuri, Arkansas, Teksas, Oklahoma, Kansas dhe Mississippi pasi tornadot përfshinë shtetet e Mesme dhe Jugore të Shteteve të Bashkuara.
Stuhitë lanë qindra familje pa energji, plagosën 29 persona në Arkansas dhe shkaktuan vdekje të lidhura me zjarret në Oklahoma.
Gati 9 milionë njerëz janë në mëshirën e ngjarjeve ekstreme të motit. Moti i keq pritet të vazhdojë edhe të dielën teksa stuhitë lëvizin drejt bregut lindor.
Videot dhe fotot e postuara në rrjetet sociale tregojnë dëme të mëdha në Cave City, Arkansas.
Në një foto, një pjesë e çatisë së një kishe duket se është shkatërruar. Një video tregon mbeturina, duke përfshirë dru nga strukturat, të shpërndara nëpër pjesë të qytetit.
Shumë banesa dhe biznese kanë pësuar dëme të mëdha materiale.
Autoritetet e Misurit raportuan “12 vdekje të lidhura me stuhitë”, duke shtuar se ata “po punojnë gjatë gjithë kohës për të ndihmuar personat në nevojë dhe për të vlerësuar dëmet” që janë shkaktuar.
Gjashtë njerëz vdiqën në kontenë Wayne, tre në kontenë Ozark, një në kontenë Butler, një në kontenë St. Louis dhe një në kontenë Jefferson, thanë autoritetet, duke përmendur “tornadot, stuhitë dhe breshrin”. Të premten, Guvernatori Mike Kehoe shpalli gjendjen e jashtëzakonshme në shtet në pritje të tornadove të parashikuara.
Ndërkohë, rreth 250,000 familje mbetën pa energji elektrike pasditen e së shtunës, njoftoi uebfaqja Poweroutage.
Pamjet nga zonat e prekura tregojnë shtëpi të shkatërruara dhe automjete të përmbysura në rrugë.
“Unë kurrë nuk kam përjetuar diçka kaq të tmerrshme.” Gjithçka ndodhi kaq shpejt, saqë ne ndjemë se do të na plasin daullet e veshit. “Unë kam një fëmijë dy vjeçar dhe jam shumë e sigurt që kemi humbur shtëpinë dhe makinat tona,” tha për KSDK banorja e Villa Ridge Alicia Wilson.
Në Kansas, të paktën tetë persona u vranë në aksidente trafiku që i atribuohen një “stuhie të fortë rëre” që uli ndjeshëm dukshmërinë, thanë autoritetet e zbatimit të ligjit.
Në Misuri, gjashtë persona kanë vdekur dhe tre janë të zhdukur, njoftoi guvernatori Tate Reeves.
Aksidentet rrugore që i atribuohen të njëjtit shkak janë shkaktuar edhe në Teksas, ku humbën jetën katër persona.
Tre të vdekur dhe 29 të plagosur është numri i deritanishëm i viktimave nga stuhitë në Arkansas, ku guvernatorja Sarah Huckabee Sanders tha se kishte informuar presidentin amerikan Donald Trump për situatën në shtetin e saj.
Shërbimi Kombëtar i Motit (NWS) ka paralajmëruar se tornadot pritet të godasin shtetet e Luizianës, Mississippi, Alabama dhe Tennessee në orët e ardhshme.
