SHBA- Sekretari i Përgjithshëm i NATO-s, Mark Rutte ka reaguar, pasi një dron rus goditi një bllok apartamentesh në qytetin rumun të Galatit gjatë një sulmi rus ndaj Ukrainës gjatë natës. Me anë të një postimi në Twitter, Rutte thekson se NATO është gati të mbrojë çdo centimetër të territorit të saj.
“Sjellja e papërgjegjshme e Rusisë përbën një rrezik për të gjithë ne. Mbrëmë treguam edhe një herë se pasojat e luftës së tyre të paligjshme të agresionit nuk ndalen në kufi. Ne do të vazhdojmë të forcojmë frenimin dhe mbrojtjen tonë në territorin tonë dhe të mbështesim Ukrainën ndërsa ajo mbrohet kundër agresionit rus,” shkroi Rutte në postimin e tij
Në një postim tjetër, Rutte tha se ka folur me Presidentin rumun dhe kanë diskutuar lidhur me situatën.
“Sapo fola me Presidentin rumun Nicos Dan (...) E sigurova për solidaritetin absolut të NATO-s me Rumaninë dhe shpreha ngushëllimet e mia për të plagosurit në këtë incident. NATO është gati të mbrojë çdo cm2 të territorit të Aleatëve," tha Rutte.
Edhe ambasadori i SHBA-së në NATO, Matthew Whitaker bëri një reagim në "X", duke e dënuar incidentin.
“Ne qëndrojmë me Rumaninë, aleatin tonë të NATO-s, dhe e dënojmë këtë ndërhyrje të papërgjegjshme në territorin e saj. Mendimet tona janë me të plagosurit në Galati. Ne do të mbrojmë çdo centimetër katror të territorit të NATO-s," tha Whitaker.
Më parë, zëdhënësja e NATO-s, Alison Hart, dënoi papërgjegjshmërinë e Rusisë nëpërmjet Twitter-it dhe shtoi se sekretari i përgjithshëm i NATO-s është në kontakt me autoritetet rumune. Komandanti Suprem i Forcave Aleate për Evropën (SACEUR), Gjenerali Amerikan Alex Grinevich, foli me Shefin e Shtabit të Përgjithshëm të Forcave të Armatosura Rumune, Gheorghe Vlad, njoftoi Shtabi Suprem i Fuqive Aleate për Evropën (SHAPE) nëpërmjet X.
Nga ana tjetër, një burim i Aleancës tha se Rumania ka mundësinë të kërkojë ose jo aktivizimin e Nenit 4 të traktatit themelues të Aleancës Atlantike. Neni 4 parashikon që aleatët do të konsultohen sa herë që një vend anëtar konsideron se integriteti territorial, pavarësia politike ose siguria e një anëtari të NATO-s është e kërcënuar.
Neni 4 është aktivizuar vazhdimisht, më së fundmi nga Polonia në vjeshtën e vitit 2025 pasi dronët rusë depërtuan në hapësirën ajrore polake. Rumania gjithashtu i ka kërkuar NATO-s të ndërmarrë hapa për të përshpejtuar transferimin e sistemeve për të kundërshtuar dronët në territorin rumun.
Që nga pushtimi i Ukrainës nga Rusia në vitin 2022, ka pasur një numër incidentesh të dronëve rusë që kanë hyrë në hapësirën ajrore të NATO-s. Dhe mbeturinat e dronëve kanë rënë vazhdimisht në tokën rumune. Rumania thirri ambasadorin e Rusisë në Bukuresht pasi një dron rus hyri në hapësirën e saj ajrore në shtator 2025, disa ditë pasi një numër i madh dronësh rusë hynë në hapësirën ajrore polake.
Shtetet baltike kohët e fundit kanë qenë cak i një numri të madh dronësh, këtë herë me origjinë ukrainase. Gjatë vizitës së saj të fundit në Vilnius, Presidentja e Komisionit Evropian Ursula von der Leyen fajësoi Rusinë për këto shkelje, duke e akuzuar atë se po kërkon të destabilizojë shoqëritë demokratike në Bashkimin Evropian. Sipas Brukselit, Rusia po devijon qëllimisht dronët ukrainas të përdorur për sulme ndaj objekteve industriale ruse dhe stacioneve të naftës në rajonin e Shën Petersburgut, në Gjirin e Finlandës.
