UKRAINË- Pesë persona u vranë dhe të paktën 17 u plagosën në sulmet ajrore ruse në Kharkiv dhe Kherson gjatë natës së së premtes dhe të shtunës, thanë autoritetet ukrainase . Tre persona u vranë në një sulm të paparë rus në Kharkiv (dy nga sulmi në një pallat apartamentesh), tha kryebashkiaku i qytetit të dytë më të madh të Ukrainës, Ihor Terekhov.
Dy të tjerë (një çift) humbën jetën në Kherson, sipas guvernatorit të provincës me të njëjtin emër, Oleksandr Prokudin. Kharkiv përball me "sulmin më të fuqishëm që nga fillimi i luftës" në shkurt 2022, theksoi Terekhov, duke folur për " të paktën 40 shpërthime" në një periudhë të shkurtër kohore.
"Armiku lëshoi njëkohësisht raketa, dronë Shahed dhe bomba ajrore të drejtuara", shpjegoi ai, duke vënë në dukje se të paktën 48 dronë, dy raketa dhe katër bomba të drejtuara u përdorën në sulmin rus.
Kharkiv, një qytet me më shumë se 1.4 milion banorë para luftës, shumica e të cilëve janë rusishtfolës, ndodhet më pak se 50 kilometra nga kufiri me Rusinë, në Ukrainën verilindore, dhe është shpesh shënjestër e sulmeve ruse. Të enjten, 18 persona, përfshirë katër fëmijë, u plagosën në sulmet ajrore ruse në Kharkiv.
Për më tepër, natën e së enjtes deri të premten, Rusia nisi një nga sulmet e saj më masive kundër Ukrainës që nga fillimi i luftës, me 407 dronë dhe 45 raketa, sipas ushtrisë ukrainase.
Numri i të vdekurve nga sulmi u rrit në të paktën shtatë sot, pasi trupi i një gruaje të re u gjet në rrënojat e një pallati në qytetin Lutsk, pranë kufirit polak. Burri i saj u gjet i vdekur dje. Tridhjetë persona u plagosën në qytet nga sulmet ruse. Presidenti ukrainas Volodymyr Zelensky tha se tre punonjës shpëtimi u vranë në Kiev, ndërsa dy persona të tjerë vdiqën në Chernihiv, në Ukrainën jugore. Një total prej të paktën 80 personash u plagosën.
"Të vrarët në Kiev ishin shpëtimtarë që mbërritën në vendngjarje pas një sulmi fillestar dhe për fat të keq u vranë në një sulm të ri rus", tha Zelensky
Nga ana e tij, Presidenti amerikan Donald Trump fajësoi dje ukrainasit për sulmin masiv rus.
"Ata i dhanë Putinit një arsye për të ardhur dhe për t'i bombarduar pa mëshirë mbrëmë", u tha Trump gazetarëve në bordin e Air Force One kur u pyet për ndikimin e breshërisë së sulmeve me dronë të Ukrainës në aeroportet ushtarake në Rusi gjatë fundjavës. Dje, ushtria ukrainase njoftoi se kishte nisur një seri të re sulmesh parandaluese në aeroportet ushtarake Engels dhe Diaghilev në rajonet ruse Saratov dhe Ryazan, si dhe në të paktën tre rezervuarë karburanti.
