Reuters: Kina trajnoi fshehurazi rreth 200 ushtarakë rusë, disa u kthyen të luftojnë në Ukrainë

Kina ka trajnuar në mënyrë të fshehtë rreth 200 pjesëtarë të ushtrisë ruse në fund të vitit 2025, ndërsa disa prej tyre janë kthyer tashmë dhe janë angazhuar në operacione luftarake në Ukrainë, raporton Reuters, duke cituar tre agjenci evropiane të inteligjencës dhe dokumente të shqyrtuara nga agjencia.

Sipas burimeve të inteligjencës, programi i trajnimit është zhvilluar në territorin kinez dhe është përqendruar kryesisht në përdorimin e dronëve, kundërmasat ndaj tyre, luftën elektronike dhe taktikat luftarake në terren.

Ushtarakët rusë janë trajnuar gjithashtu në çminim, luftën kundër minave dhe përdorimin e simulatorëve të dronëve, elementë që konsiderohen kyç në konfliktin aktual në Ukrainë.

Një dokument i cituar nga Reuters tregon se rreth 200 ushtarakë rusë ishin planifikuar të trajnoheshin në objekte ushtarake në Pekin dhe në qytetin Nanjing, ndërsa burime të inteligjencës konfirmojnë se një numër i ngjashëm ka kaluar realisht këtë trajnim.

Po ashtu, dokumentet sugjerojnë se edhe qindra ushtarakë kinezë pritet të trajnohen në bazat ushtarake në Rusi, si pjesë e një marrëveshjeje të bashkëpunimit ushtarak mes dy vendeve.

Sipas burimeve, marrëveshja për ushtrimet sekrete ushtarake Rusi–Kinë është nënshkruar më 2 korrik 2025 në Pekin.

Agjencitë evropiane të inteligjencës theksojnë se disa nga të trajnuarit rusë tashmë po marrin pjesë në luftime në Ukrainë, përfshirë në Krime dhe në rajonin e Zaporizhzhias.

Ata shtojnë se disa prej këtyre personave kanë kualifikime në nivel instruktori dhe mund të transmetojnë njohuritë e fituara brenda njësive të tyre ushtarake.

Një zyrtar i inteligjencës është shprehur se trajnimi në nivele operacionale dhe taktike i ushtarakëve rusë nga Kina, të cilët më pas angazhohen në luftë, tregon një përfshirje më të thellë të Pekinit në konfliktin në Ukrainë sesa mendohej më parë.