Mbi 10 mijë njerëz në rrugët e Oslos/ Funeral madhështor për vdekjen e mbretit norvegjez

Norvegjia është përfshirë nga zia kombëtare pas vdekjes së Mbretit Harald V, i cili ndërroi jetë në moshën 89-vjeçare pas trajtimit në spital për një sëmundje të rrallë të gjakut. Pas 35 vitesh në fron, Harald u pasua nga djali i tij, Haakon VIII, i cili mori zyrtarisht detyrën e mbretit.

Lajmi për vdekjen e Harald u bë i ditur të premten në mëngjes. Qindra qytetarë u mblodhën para pallatit mbretëror në Oslo, duke vendosur lule dhe flamuj në nderim të monarkut. Arkivoli i tij u transportua më vonë në një kortezh publik drejt pallatit, ndërsa rreth 10 mijë persona dolën në rrugët e kryeqytetit për t’i dhënë lamtumirën.

Harald V u përshkrua për vite me radhë si një “mbret i popullit”, i njohur për qasjen e tij gjithëpërfshirëse, transparencën dhe empatinë. Kryeministri norvegjez Jonas Gahr Støre tha se vendi ishte “i bashkuar në dhimbje dhe mirënjohje”, duke vlerësuar kontributin e mbretit për stabilitetin e Norvegjisë.

Në mesditë, Forcat e Armatosura norvegjeze nderuan Haraldin me 21 të shtëna ceremoniale nga kalaja Akershus në Oslo. Gjatë periudhës së zisë kombëtare, flamujt do të ulen në gjysmështizë në të gjithë vendin, ndërsa aktivitetet jo të domosdoshme do të anulohen ose shtyhen.

Mbreti i ri, Haakon VIII, 53 vjeç, zhvilloi një mbledhje të jashtëzakonshme me qeverinë dhe deklaroi se do të udhëhiqet nga motoja e familjes mbretërore, “Gjithçka për Norvegjinë”. Ai pritet të bëjë betimin para Parlamentit të martën dhe më pas të marrë pjesë në një ceremoni të posaçme, pasi Norvegjia nuk zhvillon më kurorëzime tradicionale.

Pas Haakonit, në radhë për fronin është vajza e tij 22-vjeçare, Princesha e Kurorës Ingrid Alexandra. Rregullat e trashëgimisë u ndryshuan në vitin 1990 për t’u lejuar fëmijëve të parë, pavarësisht gjinisë, të trashëgojnë fronin.

Mbreti Haakon VIII përballet me një periudhë të vështirë për familjen mbretërore, e cila këtë vit është përfshirë në disa polemika dhe probleme shëndetësore. Megjithatë, ekspertë të monarkisë norvegjeze e konsiderojnë atë një figurë të respektuar dhe punëtore.