Irani ka refuzuar zyrtarisht propozimin e fundit të SHBA-së për t’i dhënë fund luftës, duke e cilësuar atë si një plan “dorëzimi”. Sipas medias shtetërore iraniane, përgjigjja e dërguar nga Teherani në Uashington hedh poshtë ofertën amerikane dhe vendos një sërë kushtesh për çdo marrëveshje të mundshme.
Mes kërkesave kryesore të Iranit janë pagesa e dëmshpërblimeve të luftës nga SHBA-të, njohja e sovranitetit të plotë iranian mbi Strait of Hormuz, heqja e sanksioneve ekonomike dhe lirimi i aseteve iraniane të ngrira jashtë vendit.
Zhvillimi vjen vetëm disa orë pasi Presidenti amerikan Donald Trump e cilësoi publikisht përgjigjen e Teheranit si “krejtësisht të papranueshme”.
“Nuk më pëlqen, plotësisht e papranueshme!”, shkroi Trump në platformën e tij Truth Social, pa dhënë detaje të mëtejshme mbi kundërpropozimin iranian.
Nga ana tjetër, Presidenti iranian Masoud Pezeshkian deklaroi se Irani “nuk do t’i përkulet kurrë armikut” dhe se negociatat nuk nënkuptojnë dorëzim.
Sipas televizionit shtetëror IRIB, Teherani kërkon fundin e luftës “në të gjitha frontet”, veçanërisht në Lebanon, ku Izraeli vijon operacionet kundër Hezbollahut të mbështetur nga Irani, si dhe garanci për sigurinë e transportit detar në Gjirin Persik.
Raportimet e The Wall Street Journal bëjnë të ditur se Irani ka propozuar pakësimin e një pjese të uraniumit të pasuruar dhe transferimin e pjesës tjetër në një shtet të tretë, me kusht që materiali të rikthehet nëse negociatat dështojnë ose SHBA të tërhiqet nga marrëveshja.
Tensionet në rajon mbeten të larta edhe për shkak të situatës në Ngushticën e Hormuzit, rrugë strategjike nga ku kalon rreth një e pesta e furnizimit botëror me naftë. Irani ka vendosur bllokadë dhe mekanizma taksimi për anijet që kalojnë aty, ndërsa SHBA dhe aleatët e saj e konsiderojnë të papranueshëm kontrollin iranian mbi këtë korridor detar.
Ndërkohë, Britania dhe Franca po udhëheqin përpjekjet për krijimin e një koalicioni ndërkombëtar sigurie në rajon. Presidenti francez Emmanuel Macron deklaroi se Parisi nuk ka planifikuar vendosje ushtarake në Hormuz, por një mision sigurie të koordinuar me Iranin.
Situata u tensionua më tej pas raportimeve për sulme me dronë në Gjirin Persik. Emiratet e Bashkuara Arabe njoftuan se sistemet e tyre të mbrojtjes ajrore rrëzuan dy dronë të nisur nga Irani, ndërsa Kuvajti raportoi për tentativa të tjera sulmesh në hapësirën e tij ajrore.
Edhe Katari konfirmoi se një anije mallrash u godit nga një dron pranë brigjeve të tij, ndërsa media iraniane pretendoi se anija lundronte nën flamur amerikan.
Në një reagim të fortë, zëdhënësi i komisionit të sigurisë kombëtare të parlamentit iranian, Ebrahim Rezaei, paralajmëroi SHBA-në se “çdo sulm ndaj anijeve iraniane do të marrë një përgjigje të fortë dhe vendimtare”.
Sipas medias shtetërore iraniane, shefi ushtarak Ali Abdollahi zhvilloi një takim me udhëheqësin suprem të vendit, Mojtaba Khamenei, ku mori “udhëzime të reja për vazhdimin e operacioneve kundër armikut”.
