Gjermania do të blejë raketa amerikane Tomahawk/ Merz: Po mbyllim një boshllëk strategjik në mbrojtje

Kancelari gjerman Friedrich Merz ka njoftuar se Gjermania ka arritur një marrëveshje me Shtetet e Bashkuara për blerjen dhe stacionimin e raketave amerikane Tomahawk në territorin gjerman, duke e cilësuar këtë si një hap të rëndësishëm për forcimin e mbrojtjes së vendit.

Duke folur të enjten në Bundestag, pas kthimit nga samiti i NATO-s, Merz tha se marrëveshja me Uashingtonin synon të mbyllë një “boshllëk të rëndësishëm strategjik” në kapacitetet mbrojtëse të Gjermanisë.

“Në margjinat e samitit të NATO-s ramë dakord me qeverinë amerikane që raketat Tomahawk të blihen nga ne dhe të stacionohen në Gjermani. Me këtë po mbyllim një boshllëk të rëndësishëm strategjik në mbrojtjen tonë. Në të njëjtën kohë do të punojmë për zhvillimin e sistemeve tona evropiane dhe vendosjen e tyre në Evropë”, deklaroi Merz.

Kancelari vlerësoi gjithashtu rezultatet e samitit të NATO-s, duke thënë se ato “tejkaluan të gjitha pritjet”, ndërsa shtoi se aleanca ka treguar se mbetet “e bashkuar, e fortë dhe me vetëbesim”.

Në fjalimin e tij para deputetëve, Merz theksoi se objektivi i qeverisë është që Gjermania të bëhet më pak e cenueshme ndaj kërcënimeve dhe shantazhit, duke forcuar aftësitë e saj mbrojtëse dhe duke garantuar sigurinë e mënyrës së lirë të jetesës.

Ai përmendi gjithashtu marrëveshjen për shitjen e nëndetëseve të kompanisë gjermane TKMS në Kanada, duke e cilësuar atë si kontratën më të madhe ushtarake në historinë moderne të Gjermanisë.

“NATO është dhe mbetet një aleancë transatlantike. Por ne, si evropianë, e kemi kuptuar se nuk mund ta delegojmë thjesht sigurinë tonë”, u shpreh Merz.