KATAR- Delegacionet nga Izraeli dhe Hamasi kanë filluar një raund bisedimesh për armëpushim në Katar, ndërsa kryeministri izraelit Benjamin Netanyahu shkon në Uashington për t'u takuar me Donald Trump.
Netanyahu tha se mendon që takimi i tij me presidentin amerikan të hënën duhet të ndihmojë në përparimin e përpjekjeve për të arritur një marrëveshje për lirimin e më shumë pengjeve dhe një armëpushim në Gaza. Ai tha se u kishte dhënë negociatorëve të tij udhëzime të qarta për të arritur një marrëveshje armëpushimi sipas kushteve që Izraeli ka pranuar.
Hamasi ka thënë se i është përgjigjur propozimit të fundit për armëpushim me një frymë pozitive, por duket e qartë se ende ka boshllëqe midis dy palëve që duhet të kapërcehen nëse do të arrihet ndonjë marrëveshje. Për momentin, Hamasi duket se po i përmbahet në thelb të njëjtave kushte për të cilat ka këmbëngulur më parë - duke përfshirë një garanci për përfundimin e të gjitha armiqësive në fund të çdo armëpushimi dhe tërheqjen e trupave izraelite.
Ndërsa po largohej nga Izraeli për në SHBA, Netanyahu tha se ishte ende i përkushtuar ndaj asaj që ai e përshkroi si tre misione: "Lirimi dhe kthimi i të gjithë pengjeve, të gjallëve dhe të rënëve; shkatërrimi i aftësive të Hamasit - për ta nxjerrë atë që andej dhe për të siguruar që Gaza nuk do të përbëjë më një kërcënim për Izraelin".
Ndërmjetësuesit e Katarit dhe Egjiptit do të kenë shumë punë gjatë bisedimeve indirekte midis Izraelit dhe Hamasit në përpjekje për të kapërcyer pikat e ngërçit, të cilat kanë penguar iniciativa të tjera që nga përfundimi i armëpushimit të mëparshëm në mars, shkruan BBC.
Që atëherë, Izraeli ka rinisur ofensivën e tij kundër Hamasit me intensitet të madh, si dhe ka vendosur një bllokadë njëmbëdhjetë-javore ndaj ndihmave që hyjnë në Gaza, e cila u hoq pjesërisht disa javë më parë. Qeveria izraelite thotë se këto masa kanë synuar dobësimin e mëtejshëm të Hamasit dhe detyrimin e tij për të negociuar dhe për të liruar pengjet.
Vetëm gjatë 24 orëve të fundit, ushtria izraelite thotë se ka goditur 130 objektiva të Hamasit dhe ka vrarë një numër militantësh. Por edhe kostoja e jetëve të civilëve në Gaza vazhdon të rritet. Zyrtarët e spitaleve në Gaza thanë se më shumë se 30 persona u vranë të dielën.
Ushtria izraelite nisi një fushatë në Gaza në përgjigje të sulmeve të Hamasit më 7 tetor 2023, në të cilat u vranë rreth 1,200 njerëz dhe 251 të tjerë u morën peng. Të paktën 57,338 njerëz janë vrarë në Gaza që atëherë, sipas ministrisë së shëndetësisë të territorit të drejtuar nga Hamasi.
