LONDËR- Ministria e Brendshme nuk iu përgjigj shqetësimeve të ngritura në lidhje me shëndetin mendor të shqiptarit Leonard Farruku, i cili vdiq në bordin e anijes Bibby Stockholm. Sipas rezultateve të autopsisë u zbulua se vdekja e 27-vjeçarit ishte shkaktuar nga shtrëngimi në qafë dhe varje me litar. Fillimisht ai jetoi me dy kushërinj në Mbretërinë e Bashkuar përpara se të zhvendosej në akomodimin e ofruar nga Home Office, Clearsprings Ready Homes.
Udhëheqësja e ekipit të mbrojtjes, Nia Dowd, tha se i kishte dërguar urgjentisht një email Ministrisë së Brendshme me shqetësime në lidhje me shëndetin e tij mendo. Siç raportohet Farruku ishte akomoduar më parë në hotelin Esplanade në Paignton, Devon, dhe filloi të tregonte sjellje agresive në korrik 2023, duke përfshirë dëmtimin e mobiljeve në dhomën e tij, "bërtitjen ndaj stafit" dhe grindjen me një banor tjetër.
Ai u raportua gjithashtu se kishte treguar sjellje të reja në gusht kur i bëri komente seksuale një gruaje. Farruku u gjet i pavetëdijshëm në një kabinë dushi në bordin e anijes Bibby Stockholm në Portland Port, Dorset, më 12 dhjetor 2023. Motra e tij Marsida Keci dhe Jola Dushku kanë vënë në dyshim se si vëllai i tyre, i cili sipas tyre kishte probleme me shëndetin mendor që nga vdekja e prindërve të tyre, u lejua të zhvendosej.
Udhëheqësja e ekipit të mbrojtjes, Nia Dowd, tha se stafi e konsideronte atë si person me probleme serioze të shëndetit mendor. Sipas hetimeve Farruku kishte kërkuar të kthehej në vendin e tij të lindjes për të marrë mbështetje për shëndetin mendor, por më vonë ndryshoi mendje. Ai gjithashtu refuzoi ofertat për referime në shërbimet e shëndetit mendor dhe nuk mori pjesë kur një ekip i reagimit të shpejtë u dërgua në hotel për ta ndihmuar.
Dowd tha se shëndeti i tij mendor duhej të vlerësohej ndërsa hoteli po mbyllej. Por Ministria e Brendshme e transferoi atë jashtë kujdesit të tyre në Bibby Stockholm para mbylljes më 3 nëntor, së bashku me një numër burrash të tjerë. Në emailin e saj drejtuar qeverisë, Dowd tha se kishte theksuar përfshirjen e tij në incidente të shumta.
Ajo tha se nuk kishte marrë përgjigje dhe personalisht nuk kishte qenë në gjendje ta ndiqte çështjen për shkak se kishte qenë jashtë pune për një periudhë kohore. Ajo mësoi për vdekjen e zotit Farruku vetëm duke lexuar për të në gazeta. Kur u pyet nëse Ministria e Brendshme kishte kontaktuar ndonjë koleg në Clearsprings në lidhje me Farrukun, Dowd u përgjigj: "Nuk besoj se dikush e ka bërë. Nuk ishte roli im të sfidoja ndonjë vendim që ata marrin,"
