26 vite nga bombardimet e NATO-s kundër ushtrisë serbe, presidenti Cliton më 24 mars 1999: Po veprojmë për të mbrojtur mijëra njerëz të pafajshëm në Kosovë!

KOSOVË- Më 24 Mars 1999, SHBA dhe Organizata e Traktatit të Atlantikut të Veriut (NATO) filluan sulmet ajrore kundër Jugosllavisë me bombardimet e pozicioneve ushtarake serbe në Kosovë. Kjo ishte ndërhyrja më e madhe e Aleancës së Atlantikut të Veriut në mbrojtje të popullit të Kosovës, duke treguar vendosmërinë e demokracive perëndimore për të kundërshtuar diktatorin Sllobodan Millosheviç. Ai për dy vjet përdori dhunë sistematike, vrasje, masakra, gjenocid dhe spastrime etnike anë e mbanë Kosovës.

Para nisjes së bombardimeve, presidenti amerikan Bill Clinton mbajti edhe një fjalim ku edhe u sqaroi amerikanëve se pse kjo fushatë ishte e nevojshme.

“Sot forcat tona iu bashkuan NATO-s kundër forcave serbe që janë përgjegjëse për brutalitetin në Kosovë. Po veprojmë për t’i mbrojtur mijëra njerëz të pafajshëm në Kosovë nga ofensiva ushtarake, po veprojmë për ta parandaluar një luftë më të gjerë”, kishte thënë ai.

Gjatë fjalimit të tij, ai theksoi se Serbia agresore ishte mospërfillëse edhe kur liderët kosovarë, gjatë kohës kur shqiptarët e Kosovës po vriteshin, ishin pajtuar për paqe.

“Për vite me radhë kosovarët ishin munduar paqësisht që të rifitonin të drejtat e tyre, kur Millosheviç i dërgoi trupat e tij që t’i shtypte, kjo përpjekje u bë e dhunshme. Ne propozuam një marrëveshje të paqes që liderët kosovarë e nënshkruan, megjithëse nuk i dha gjithçka që donin ndërsa serbët refuzuan edhe të diskutojnë. Kjo nuk ishte luftë në kuptimin tradicional, ishte sulm me tanke e artileri ndaj njerëzve që në masë të madhe ishin pa mbrojtje, liderët e të cilëve u pajtuan për paqe”, theksoi ai.

Bombardimet e aleancës ushtarake perëndimore ndaj Jugosllavisë, që përbëhej nga Serbia dhe Mali i Zi, nisën pas dështimit të negociatave të vitit 1999 për zgjidhjen e konfliktit në Kosovë, teksa pala serbe refuzoi nënshkrimin e një marrëveshjeje për paqe në Rambuje.

Bombardimet, që zgjatën 78 ditë, u ndërprenë më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara, që parashihte administrimin e Kosovës nga një mision i OKB-së.