Origjina e errët e Halloween: Kontakti me shpirtrat e të vdekurve!

Më 31 tetor të çdo viti në shumë vende të botës, përfshirë edhe Shqipërinë, festohet Halloween-i. Ndërsa festohet kryesisht nga adoleshentët dhe fëmijët, të cilët përdorin maska dhe dekorime të frikshme, origjina e Halloween nuk është dhe aq argëtuese.

Halloween-i ka origjinën e tij në festën pagane të Samhain-it, e cila ishte një kremtim i fundit të verës dhe fillimit të dimrit të ftohtë, një periudhë që simbolizonte edhe kontaktin me shpirtërat e të vdekurve sipas besimeve të lashta kelte.

Kjo origjinë e Halloween-it, e mbushur me elemente të okultizmit dhe adhurimit të shpirtrave, është një nga arsyet pse disa komunitete fetare kanë zgjedhur të qëndrojnë larg tij, për shkak të përmbajtjes së saj të lidhur me misterin dhe simbolikat e botës së përtejme, që bie ndesh me disa nga parimet e besimeve të tyre.

Në disa burime të krishtera, sugjerohet që festimi i Halloween-it mund të nxisë elemente që lidhen me të mbinatyrshmen dhe të errëtën, të cilat janë larg vlerave dhe frymës pozitive që promovon feja. Një artikull i publikuar në faqen Christian Broadcasting Network (CBN) sugjeron se shumë të krishterë e shohin të pavend angazhimin në një festë që përfshin elemente simbolike të vdekjes dhe demonologjisë, duke u frikësuar nga ndikimet që kjo mund të ketë në mendjet e të rinjve dhe tek vlerat e komunitetit të krishterë.

Sipas disa drejtuesve të krishterë, Halloween-i i bën të rinjtë të përqendrohen në frikën dhe elementet e errëta të botës shpirtërore, duke i nxitur që t'i trajtojnë këto gjëra si argëtuese apo të padëmshme. Sipas tyre, kjo nuk përputhet me qëllimin e besimit të krishterë që promovon dashurinë, shpresën dhe dritën.

Në të njëjtën linjë, besimi islam distancohet nga festimi i Halloween-it. Halloween-i nuk është pjesë e traditës islame dhe për shumë myslimanë konsiderohet e pavend të angazhohen në një festë që ka origjinë në besimet pagane dhe që përqendrohet në adhurimin e shpirtërave dhe të vdekurve. Sipas Islam Question & Answer, shumë dijetarë myslimanë e shohin Halloween-in si një festë që bie ndesh me mësimet e Kuranit, i cili nxit shmangien e çdo praktike që lidhet me adhurimin e dikujt ose diçkaje përveç Zotit.