Vrasja e Renis Dobrës/ Kamerat e sigurisë zbulojnë lëvizjet e autorëve, Petrit Çakrri dhe vëllezërit Bushgjoka pinë kafe në një pikë karburanti, dëshmitë kontradiktore

TIRANË- Detaje të reja janë zbardhur në lidhje me lëvizjet e autorëve përpara se të kryhej vrasja e 23-vjeçarit, Renis Dobra. Dy të arrestuarit gjatë dëshmive para grupit hetimor kanë mohuar se janë të përfshirë në këtë ngjarje.

Pas sekuestrimit të kamerave të sigurisë të bizneseve përgjatë aksit kombëtar Burrel-Tiranë, mësohet se Petrit Çakrri dhe vellezerit Bushgjoka janë ulur për të pirë kafe pranë një pike karburanti. Më pas ata kanë qarkulluar me dy automjete, një “Range Rover” të zi dhe me një “Hundyai Santa Fe”, nga Burreli drejt fshatit Zenisht.

Çakrri ka deklaruar se i vetmi nga vëllezërit Bushgjoka që njihte ishte Kristi Bushgjokaj, i cili aktualisht është në kërkim nga policia. Ai ka sqaruar se me Kristi Bushgjokën është njohur në burg. Ajo që vihet re është se deklarata e Çakrrit bie në kontraditë me pamjet. Ai thotë se njeh vetëm Kristin ndërsa pamjet e paraqesin në kafe edhe me Fatjon dhe Aleksandër Bushgjokajn. Sipas tij pas daljes nga burgu ata kanë ruajtur marrëdhënien e tyre. Çakrri shtoi se ishte takuar me vëllezërit Bushgjoka pasi ata i kishin thënë se do të dilnin në zonë për të kërkuar një sasi droge nëpër fshatra.

Ai ka shtuar se në një moment, vëllezërit Bushgjoka janë futur në një tjetër makinë, që sipas grupit hetimor, mendohet të jetë automjeti i 23-vjeçarit. Sipas tij pasi janë futur në mjet i kanë thënë që të largohet. Sa i përket vrasjes së Dobrës, Çakrri tha se e mori vesh ngjarjen nga mediat.