Vrasja Arlinda Zekajt/ Dy ditë pas krimit autori vijon të jetë në arrati, policia sekuestron armë, thika dhe sëpatën në banesën e kunatit 

KOSOVË-  Autori i vrasjes së Arlinda Zekajt vazhdon të jetë në arrati, dy ditë pasi kreu krimin. Albert Sylaj, kunati i viktimës nuk është kapur ende nga autoritetet, megjithatë, policia e Kosovës ka bastisur shtëpinë e tij. Sipas autoriteteve të Kosovës, në banesën e autorit janë sekuestruar armë, thika e një sëpatë.

“Lidhur me rastin, gjatë kontrollit të shtëpisë së të dyshuarit mashkull kosovar, është gjetur dhe sekuestruar: një pushkë gjuetie, 153 fishekë, disa karikatorë, disa pajisje të armës, tri thika, një bajonetë, 115 gëzhoja dhe një sëpatë”, thuhet në njoftim e policisë.

Ndërkohë, Prokuroria Themelore e Pejës ka njoftuar se është paraqitur kërkesa për paraburgim për ish-bashkëshortin e Arlinda Zekajt. Jeton Sylaj dyshohet për mospërfillje të gjykatës, pasi ekzistonte urdhri që të mos ushtronte dhunë fizike apo psikike, të mos e pengonte lëvizjen e viktimës dhe të mos e ofendonte, shqetësonte apo kërcënonte atë.

“I pandehuri dyshohet se ka ushtruar sërish dhunë psikologjike ndaj bashkëshortes së tij, tani të ndjerës A.Z., duke iu drejtuar me fjalë kërcënuese. Gjithashtu, dyshohet se ka marrë rrobat e vendosura nga viktima në rrobalarëse dhe i ka hedhur në oborrin e shtëpisë”, thuhet në njoftimin e Prokurorisë.

Arlinda Zekaj u vra nga kunati i saj vetëm dhjetë minuta pasi u shoqërua nga policia në shtëpinë e saj, pas denoncimit për dhunë në familje nga ish-bashkëshorti. Tre ditë para se të vritej, ajo kishte kërkuar mbrojtje nga shteti e kishte ngritur alarmin për neglizhencë nga zyrtarët në trajtim të rastit të saj. Letrat që i dorëzoi të kryeprokurorja e Pejës, kryetari i gjykatës së Pejës dhe kryeprokurori i shtetit, siç thoshte edhe vetë Arlinda Zekaj ishin shpresa e saj e fundit.