LEZHË- Policia e Lezhës ka finalizuar operacionin e koduar “Aksi”, duke vënë në pranga një person të shpallur në kërkim ndërkombëtar nga autoritetet spanjolle. Përmes bashkëpunimit të Interpol Madrid, dhe Interpol Tirana, specialistët e Seksionit për Hetimin e Krimeve kundër Pronës dhe Pasurisë, me shërbimet e Forcës së Posaçme “Shqiponja”, bënë të mundur lokalizimin dhe kapjen e të kërkuarit.
Në pranga ra Ardit Isufi, 45 vjeç, teksa qarkullonte me automjet tip "Benz" në rrethrrotullimin e Shëngjinit. A i u arrestua me qëllim ekstradimin e tij drejt Spanjës. Sipas autoriteteve, në vitin 2025, Gjykata në Spanjë i ka caktuar Isufit masën e sigurisë “Arrest në burg”, për veprën penale “Vjedhja me armë”, e kryer nga një grup i strukturuar kriminal.
Gjatë kontrollit, policia sekuestroi një leje drejtimi të falsifikuar. Ndërkohë materialet procedurale iu referuan Prokurorisë së Lezhës për veprime të mëtejshme. ndërsa Interpol Tirana vijon bashkëpunimin me homologët spanjollë për përfundimin e procedurave të ekstradimit e 45-vjeçarit.
Njoftimi i policisë:
DVP Lezhë- Finalizohet operacioni i koduar “Aksi”, për kapjen e një shtetasi të kërkuar ndërkombëtarisht. Kapet pjesëtari i një grupi kriminal që akuzohet se ka kryer vjedhje me armë, në Spanjë. Specialistët e Seksionit për Hetimin e Krimeve kundër Pronës dhe Pasurisë, në bashkëpunim me shërbimet e Forcës së Posaçme “Shqiponja, si rezultat i sigurimit të informacionit në rrugë operative, mbi vendndodhjen e shtetasit të kërkuar për llogari të Spanjës, dhe shkëmbimit të këtyre informacioneve, me Interpol Madridin, nëpërmjet Interpol Tiranës, finalizuan operacionin e koduar “Aksi”.
Në kuadër të operacionit, u kap teksa lëvizte me automjet, te rrethrrotullimi i Shëngjinit, dhe u arrestua provizorisht, me qëllim ekstradimin në Spanjë, shtetasi A. I., 45 vjeç. Në vitin 2025, autoritetet gjyqësore në Spanjë i kanë caktuar këtij shtetasi, masën e sigurisë “Arrest në burg”, për veprën penale “Vjedhja me armë”, kryer në kuadër të grupit të strukturuar kriminal. Nga verifikimet e mëtejshme rezultoi se 45-vjeçari drejtonte automjetin tip “Benz”, me leje drejtimi të dyshuar të falsifikuar. Me cilësinë e provës materiale u sekuestruan automjeti tip “Benz” dhe dokumenti i dyshuar i falsifikuar. Materialet procedurale iu referuan Prokurorisë së Lezhës, për veprime të mëtejshme. Ndërkaq, Interpol Tirana vijon bashkëpunimin me homologët, për të finalizuar procedurën për ekstradimin e shtetasit A. I., në Spanjë."/
