ZVICËR- Në fillim të fjalimit të tij në Forumin Ekonomik Botëror në Davos, presidenti i SHBA-së Donald Trump vlerësoi arritjet e mandatit të tij të dytë. Një ditë më parë (20.01.2026) u shënua përvjetori i parë i mandatit të tij të dytë presidencial. Trump bëri fjalë për një ekonomi amerikane në lulëzim, nga e cila, sipas tij, do të përfitojë e gjithë bota. Ai e quajti këtë një mrekulli ekonomike.
Lipset një angazhim më i madh evropian për t'i dhënë fund luftës në Ukrainë
Presidenti i SHBA-së, Donald Trump, bëri thirrje për një përfundim të shpejtë të luftës në Ukrainë në Forumin Ekonomik Botëror. 31,000 njerëz u vranë vetëm muajin e kaluar, tha Trump në Davos. "Është një masakër atje dhe dua që ajo të marrë fund." "Çfarë fitojnë Shtetet e Bashkuara për gjithë këtë punë, për të gjitha këto para, përveç vdekjes, shkatërrimit dhe shumave të mëdha parash, që njerëzit nuk kanë mirënjohje për atë që po bëjmë?" vazhdoi Trump. NATO dhe Evropa duhet të kujdesen për Ukrainën. SHBA-jaështë larg. "Kemi një oqean të madh dhe të bukur që na ndan prej saj. Nuk kemi të bëjmë fare me të", tha Trump.
Trump "nuk do të përdor forcë" në grindjen për Groenlandën
Në javët e fundit, presidenti i SHBA-së nuk e ka përjashtuar kurrë plotësisht vënien e Groenlandës nën kontroll me një ndërhyrje ushtarake. Në fjalimin e tij në Davos Trumpe bëri të qartë se nuk do të përdoret forcë. "Sinqerisht, ne do të ishim të pandalshëm nëse do ta bënim këtë. Por unë nuk do ta bëj këtë," tha Trump. "Nuk kam nevojë të përdor forcë. Nuk dua të përdor forcë. Nuk do të përdor forcë. E tëra çfarë SHBA-ja do është një vend i quajtur Groenlandë."
Trump vë theksin tek aspekti i sigurisë lidhur me Groenlandën
Presidenti i SHBA-së Donald Trump u përpoq edhe një herë të justifikojë pretendimet ndaj Groenlandës për arsye sigurie. "Kam respekt të madh për popullin e Groenlandës dhe të Danimarkës", tha Trump, "por çdo aleat i NATO-s duhet të jetë në gjendje të mbrojë territorin e vet".
Ai pohoi se askush përveç SHBA-së nuk është i aftë të mbrojë Groenlandën. Trump kujtoi Luftën e Dytë Botërore, kur Danimarka u pushtua nga Gjermania. Ai pretendoi se SHBA-ja shpëtoi Groenlandën dhe se ishte budallallëk nga ana e SHBA-së që ta kthente ishullin Arktik. Ai e akuzoi Danimarkën se ishte mosmirënjohëse.
Kritika të ashpra ndaj NATO-s
Fjalimi i Trump u shndërrua në një përballje të vërtetë me NATO-n. "Ne nuk morëm kurrë asgjë", pohoi Trump, edhe pse NATO aktivizoi Nenin 5 të Traktatit pas sulmeve terroriste të 11 shtatorit 2001 dhe mori pjesë në luftën në Afganistan. Aleatët e SHBA-së pësuan qindra viktima në konflikt. SHBA-ja do të qëndrojë 100% pas NATO-s, tha Trump, por tha, se nuk është i sigurt nëse NATO është e dobishme për SHBA-në. Në formulime të ndryshme, Trump u ankua se SHBA-ja është në disavantazh brenda NATO-s, mban barrën kryesore dhe merrnin shumë pak përfitime nga aleanca.
Trump: Europa ka ndryshuar sa nuk njihet më
Në fjalimin e tij, presidenti i SHBA-së Donald Trump përsëriti kritikat e tij kryesorendaj shteteve evropiane. Kontinenti i vjetër nuk po shkon më në drejtimin e duhur, tha Trump. "Unë nuk e njoh më atë." Ai përmendi përsëri imigracionin masiv dhe fokusimin tek energjitë e rinovueshme të gjelbra si rrugën e gabuar. Duke iu referuar "Marrëveshjes së Re të Gjelbër", ai i quajti energjitë e rinovueshme një "Mashtrim të Ri të Gjelbër". Turbinat me erë prishin peizazhin dhe me çdo rrotullim humbasin para, pohoi Trump. Gjermania, për shembull, tani po prodhon më pak energji sesa në vitin 2017, tha ai./DW
