VIDEO/ Furnizoi protestuesit me mjete piroteknike, arrestohet i riu në Tiranë

TIRANË- Një 24-vjeçar është arrestuar në Tiranë, pasi dyshohet se furnizonte me lëndë piroteknike protestuesit gjatë tubimit të tri ditëve të fundit në kryeqytet. Gjatë operacionit të koduar “Fireworks”, policia zbuloi një banesë në rrugën “Jargavani”, ku i riu kishte magazinuar 344 kuti me lëndë piroteknike të llojeve të ndryshme, me vlerë rreth 40 mijë euro.

Sipas Policisë, dyshohej se 24-vjeçari i kishte magazinuar këto lëndë me qëllim përdorimin e tyre për veprimtari të kundërligjshme. Ai dyshohet se ua furnizonte ato personave të maskuar dhe të përfshirë në akte dhune gjatë protestave të ditëve të fundit. Materialet procedurale i janë referuar Prokurorisë së Tiranës për veprime të mëtejshme.

Tiranë/Finalizohet operacioni i koduar “Fireworks”. Zbulohet një banesë ku ishin magazinuar lëndë piroteknike të kontrabanduara, dyshohet për t’ua shitur pjesëmarrësve në protestat e ditëve të fundit, arrestohet 24-vjeçari. Sekuestrohen 344 kuti me lëndë piroteknike të ndryshme, me vlerë rreth 40 000 euro. Si rezultat i kontrolleve dhe punës operative, bazuar në informacionet e marra në rrugë operative për një shtetas që kishte magazinuar në banesë sasi të konsiderueshme lëndësh piroteknike, me qëllim përdorimin për qëllime të kundërligjshme, specialistët e Seksionit për Hetimin e Krimeve Ekonomiko-Financiare finalizuan operacionin e koduar “Fireworks”.

Si rezultat i operacionit, u arrestua në flagrancë shtetasi E. R., 24 vjeç. Nga kontrolli në katin e parë të banesës së 24-vjeçarit, në rrugën “Jargavani”, u gjetën 344 kuti me lëndë piroteknike, që dyshohet se ky shtetas ua furnizonte personave të maskuar e të dhunshëm gjatë protestave të tri ditëve të fundit. Vijojnë kontrollet dhe veprimet hetimore për identifikimin e personave të tjerë të përfshirë në këtë veprimtari të paligjshme, si dhe për dokumentimin e plotë ligjor të rastit. Materialet procedurale iu referuan Prokurorisë së Tiranës, për veprime të mëtejshme