Thatësirë rekord në fillim të korrikut në Evropë dhe Mesdhe, ja vendet më të prekura

EVROPË- Më shumë se gjysma e tokës, 52% në Evropë dhe rajonin e Mesdheut u prek nga thatësira në fillim të korrikut. Sipas  të dhënave të fundit nga Observatori Evropian i Thatësirës, EDO kjo është norma më e lartë e regjistruar për periudhën 1 deri më 10 korrik që nga viti 2012 kur filluan të mbaheshin të dhëna. Gjithashtu thatësira është 21% më e lartë se mesatarja për periudhën 2012-2024.

Megjithatë, niveli i thatësirës ka rënë pak krahasuar me dhjetë ditët e fundit të qershorit, kur u regjistrua rekordi absolut me 55.5% të bregdeteve evropiane dhe mesdhetare të prekura. Indeksi Evropian i thatësirës i Kopernikut, bazuar në vëzhgimet satelitore, kombinon tre parametra: reshjet, lagështinë e tokës dhe gjendjen e bimësisë.

Ai ndahet në tre nivele thatësire në monitorim, paralajmërim, alarm. Evropa Lindore është rajoni më i goditur. Në Kosovë, Serbi dhe Bullgari, pothuajse 100% e territorit është prekur nga thatësira dhe më shumë se një e treta është në gatishmëri. Ndërprerjet e ujit prekën më shumë se 156,000 njerëz në Bullgari në mesin e korrikut, pasi furnizimet me ujë bëhen gjithnjë e më të pakta çdo vit.

Në Hungari, pothuajse gjysma e vendit ishte në gjendje gatishmërie në fillim të korrikut (47%), një rritje e konsiderueshme krahasuar me fundin e qershorit (21%). Thatësira është gjithashtu e rëndë në Mesdheun lindor, veçanërisht në Armeni (95%). Në Turqi (77%), situata, e kombinuar me erërat e forta, ka shkaktuar qindra zjarre.

Gjysma e Sirisë është prekur gjithashtu nga një thatësirë që kërcënon korrjen e grurit dhe vë më shumë se 16 milionë njerëz në rrezik të pasigurisë ushqimore këtë vit, sipas OKB-së. Në Britani, 18% e territorit është në gjendje gatishmërie, një rritje prej më shumë se 6 pikësh që nga fundi i qershorit. Franca është gjithashtu e prekur, me 12% të territorit të saj në gjendje gatishmërie, kryesisht në pjesën perëndimore të vendit. Spanja dhe Portugalia mbeten relativisht të paprekura, me norma shumë të ulëta thatësire (përkatësisht 6% dhe 1%).