Shqipëria mbyll Kapitullin 20 të negociatave me BE-në/ Rama flet për projektin e Kushner në Zvërnec dhe SHISH: Projekti do realizohet, po luftojmë korrupsionin

 

LUKSENBURG- Kryeministri i vendit, Edi Rama foli për projektin e Jared Kushner në Zvërnec dhe procesin e integrimit europian, gjatë Konferencës së 10-të Ndërqeveritare mes Shqipërisë dhe Bashkimit Europian. Rama e cilësoi projektin si një investim ambicioz, i cili synon të ndërthurë zhvillimin ekonomik me ruajtjen e natyrës.

Në lidhje me këtë, ai tha se rezultatet e punës së bërë do të prezantohen të mbështetura në fakte, ndërsa ftoi të interesuarit ta shohin nga afër Shqipërinë dhe zhvillimet në vend.

Duke folur për luftën kundër korrupsionit, Rama deklaroi se kultura e pandëshkueshmërisë ka marrë fund dhe se askush nuk është mbi ligjin. Në fund, ai theksoi se Shqipëria po vijon punën për përmbushjen e detyrimeve në procesin e negociatave me BE-në.

Edi Rama: Nuk jam i vetëdijshëm, apo nuk e di secili kapitull do të mbyllet, por di që secili kapitull ka rëndësinë e vet. Njohim çdo paragraf dhe çdo kapitull, kemi një ekip fantastik. Për pyetjen e dytë do ju ftoja që të vinit në Shqipëri, sepse po ta shihni Shqipërinë nga jashtë ngatërrohesh, do të hutoheni.

Nuk di se çfarë mendoni për projektin e Jared Kushner, në fakt është një projekt që përfshin më shumë sesa një emër. Është një projekt ku kemi një ambicie të madhe dhe duam ta ruajmë si një model, se si mund të investojmë e të zhvillohemi në raport me natyrën. Na kanë bërë që të ecim drejt rezultateve që mund të jenë shumë më bindëse, të cilat do të mbështeten me fakte, prandaj presim me padurim për të treguar gjithë punën që po bëhet.

Vendi juaj mund ta kuptojë shumë mirë se çfarë do të thotë kur drejtësia bën punën e vet, do të thotë që vendi ka filluar të bëjë punën e vet. Kultura e pandëshkueshmërisë ka mbaruar dhe askush nuk është mbi ligjin. Ai që dje ishte sistem i kontrolluar për korrupsionin, sot jemi këtu për të mbyllur një kapitull dhe do të mbyllim edhe kapituj të tjerë. Është çështje këndvështrimi.