Rama për studentët: Ata që qëllojnë me gurë, zara hekuri e vidha për t’i nxjerrë sytë policisë, janë kriminelë

TIRANË- Kryeministri Edi Rama ka quajtur kriminelë studentët dhe nxënësit që gjuajnë efektivët e policisë me gurë, zara hekuri dhe vida. Gjatë një dalje 'Live' në Facebook, Rama tha se është përpjekur të shmangë përfshirjen në situatën e krijuar dhe të mos bjerë në grackën e dhunës që kërkon gjakderdhje.

Në fund, Rama pranoi se personat që përfshihen në akte të tilla janë të rinj shqiptarë, studentë dhe nxënës dhe se jeta e tyre mbetet e çmuar.

"Me një pikë uji në oqeanin e çudirave që thuhen dhe përhapen dhe vendosa të jem këtu sot, t’ju shoh në sy dhe të më shikoni në sy dhe të përpiqem të them gjërat e mia pasi për disa ditë, qysh se kjo flamë ka nisur jam përpjekur të mos përfshihem dhe të ndjek e të koordinoj me shumë durim një përpjekje aspak të lehtë për të mos rënë në kurthin e ngritur të dhunës që kërkon gjak. Kërkohet gjak! Unë e di historinë e këtij bulevard, I kam ende të freskëta në kujtesë ato që ndodhën më 21 janar, kur nuk u prek asnjë institucion, ku nuk u hodh asnjë molotov, ku nuk u dëmtua dhe nuk u dogj askush nga forcat e rendit dhe ku u vranë me plumba 4 protestues dhe u plagosën dhjetëra të tjerë, që ndryshe nga sot nuk shkuan dot as në spital sepse i priste druri dhe u mjekun nga shtëpia. Ata që qëllojnë me gurë, zara hekuri e vidha për t’i nxjerrë sytë policië, janë kriminelë. Janë fëmijë shqiptarë dhe jeta e tyre vlen më shumë se çdo gjë tjetër. Vetëpërmbajtja është A dhe ZH.", tha ai.