"Procesi i rinumërimit do të zgjasë 18-20 ditë", Celibashi: KQZ nuk do të kërkojë para shtesë, kemi kursyer fonde nga procesi votimit jashtë vendit

TIRANË- Kryekomisioneri i KQZ-së, Ilirjan Celibashi tha sot në deklaratën për mediat se procesi i rinumërimit të votave do të zgjasë 18 deri në 20 ditë. Ai tha se gjithçka do të realizohet nga stafi i KQZ-së dhe se muajt korrik dhe gusht do t'i gjejë të angazhuar me zgjedhjet, ndërsa shtoi se lejet vjetore të punonjësve janë anuluar.

Më tej bëri me dije se për realizimin e procesit KQZ-ja nuk do të kërkojë para shtesë, pasi sipas tij janë kursyer fonde nga procesi i votimit të diasporës. 

"Procesi do të zgjasë 18-20 ditë. Të paktën edhe gjysma e parë e gushtit do na gjejë ende të angazhuar me zgjedhjet e 11 majit. Nuk do të angazhojë fonde të tjera shtesë, KQZ s’do kërkojë fonde shtesë për këtë proces, kemi kursyer fonde nga procesi i votimit nga jashtë, nga kontrata që kemi me operatorin e shërbimit postar dhe aspekte të tjera të këtij procesi dhe procesit zgjedhor më tërësi. Nga një vlerësim paraprak, s’do kemi nevojë për fonde shtesë për këtë proces”, tha Celibashi.