Po drejtonte gomonen dhe ra në det, shpëtohet 35-vjeçari te Gjiri i Llamanit

Një incident që mund të kishte përfunduar me pasoja të rënda u shmang falë ndërhyrjes së shpejtë të Policisë Kufitare në Himarë, pasi një gomone po lëvizte në mënyrë të pakontrolluar dhe me shpejtësi, pa persona në bord.

Sipas njoftimit zyrtar, pas marrjes së sinjalizimit, shërbimet e Policisë Kufitare ndërhynë menjëherë në zonën e “Kepit të Rigonit”, përballë plazhit të Llamanit. Verifikimet zbuluan se drejtuesi i mjetit lundrues, shtetasi E.M., 35 vjeç, banues në Orikum, kishte rënë në det gjatë lëvizjes së gomones.

35-vjeçari arriti të dilte në gjirin e Llamanit, ku u gjet i dëmtuar në këmbë. Ai u transportua në spital për të marrë ndihmë mjekësore dhe, sipas autoriteteve, ndodhet jashtë rrezikut për jetën.

Ndërkohë, gomonia vazhdonte të lëvizte pa kontroll, duke paraqitur rrezik serioz për mjetet e tjera lundruese dhe pushuesit në zonë. Një punonjës i Njësisë Policore Detare arriti të hipte në bord dhe ta ndalonte mjetin, ndërsa më pas ai u shoqërua në Pikën e Kontrollit Kufitar Himarë për verifikime të mëtejshme.

Himarë / Policia Kufitare shmang një tragjedi të mundshme në det

Ndërhyrja e menjëhershme e shërbimeve të Policisë Kufitare në Himarë shmangu sot një ngjarje me pasoja të rënda në det.

Pas njoftimit se një gomone po lëvizte në mënyrë të pakontrolluar dhe me shpejtësi, pa persona në bord, shërbimet e Policisë Kufitare ndërhynë menjëherë në zonën e “Kepit të Rigonit”, përballë plazhit të Llamanit.

Nga verifikimet rezultoi se drejtuesi i mjetit lundrues, shtetasi E. M., 35 vjeç, banues në Orikum, kishte rënë në det gjatë lëvizjes dhe kishte dalë në gjirin e Llamanit, i dëmtuar në këmbë. Ai u transportua në spital për ndihmë mjekësore dhe ndodhet jashtë rrezikut për jetën.

Gomonia, e cila paraqiste rrezik për mjetet e tjera lundruese dhe për pushuesit, u vu nën kontroll nga Njësia Policore Detare dhe Policia Kufitare. Një punonjës i Njësisë Policore Detare mundi të hidhej në bordin e gomones dhe ta ndalonte atë.

Më pas, mjeti lundrues u tërhoq në PKK Himarë për verifikime të mëtejshme.

Policia Kufitare vijon të jetë e angazhuar maksimalisht në shërbim të qytetarëve, vizitorëve dhe turistëve. Në këtë kuadër, ajo fton qytetarët që, në rast nevoje, të telefonojnë në numrin 112.