Plagosi me thikë në kokë 18-vjeçarin , arrestohet njerku në Korçë

KORÇË– Policia e Korçës ka finalizuar hetimet për ngjarjen e rëndë të ndodhur mbrëmjen e djeshme, ku një konflikt i çastit brenda familjes ka përfunduar me plagosjen e një të riu.

Sipas njoftimit zyrtar të autoriteteve, ngjarja është regjistruar në orët e vona të mbrëmjes. Rreth orës 21:55, në ambientet e Spitalit Rajonal të Korçës ka mbërritur për ndihmë mjekësore A. S., rreth 18 vjeç.

I riu ka paraqitur plagë në kokë, të shkaktuara nga një mjet prerës. Nga hetimet paraprake dhe verifikimet e kryera nga uniformat blu, ka rezultuar se plagosja ka ndodhur gjatë një sherri të çastit me njerkun e tij. Policia po punon për zbardhjen e plotë të rrethanave të ngjarjes dhe motivet që çuan në përshkallëzimin e dhunës në këtë konflikt familjar.

Njoftimi i plotë i Policisë:

“Plagosi me mjet prerës djalin e bashkëjetueses, falë reagimit të menjëhershëm të shërbimeve të Policisë lokalizohet dhe vihet në pranga 37-vjeçari.

Rreth orës 21:55, në spital është paraqitur i dëmtuar në kokë, dyshohet me mjet prerës, shtetasi A. S., rreth 18 vjeç, i cili, sipas të dhënave paraprake, është dëmtuar gjatë një konflikti për motive të dobëta me njerkun e tij, shtetasin N. B., 37 vjeç.

Pas ngjarjes, 37-vjeçari është larguar nga vendi i konfliktit. Falë reagimit të menjëhershëm të shërbimeve të Policisë, u bë i mundur lokalizimi, kapja dhe shoqërimi në Komisariat, për kryerjen e veprimeve të mëtejshme procedurale, i autorit të dyshuar të ngjarjes.

Grupi hetimor, nën drejtimin e Prokurorisë, vijon punën në terren për zbardhjen e plotë të rrethanave dhe dokumentimin ligjor të këtij rasti të rëndë”., njofton Policia. 

plagosi me thikë në kokë 18-vjeçarin arrestohet njerku në korçë korçë