TIRANË- Është shkarkuar sot nga Komisioni i Posaçëm i Apelimit, prokurori i Shkodrës, Agron Bushati, i cili për gati 30 vite me radhë ka qenë pjesë e Drejtësisë, duke filluar karrierën fillimisht si Oficer i Policisë Gjyqësore dhe më pas prokuror në Shkodër.
Kreu i SPAK Altin Dumani, i qëndroi ankimit të bërë nga ana e Komisionerit Publik për subjektin Agron Bushati, duke shtuar në dosje dhe një masë disiplinore “Vërejtje Publike” që Këshilli i Lartë i Prokurorisë mori ndaj tij, në muajin Tetor 2024. Nga sot Agron Bushati, që në prokurorinë e Shkodrës drejtonte seksionin e ekzekutimeve të vendimeve penale është lënë pa punë, për shkak së ndërprerjes nga KPA të funksionit të tij si magjistrat.
Bushati, kishte kaluar me sukses procesin e vettingut në shkallën e parë, por një ankim i bërë nga Komisioneri Publik dhe i mbrojtur fort deri në fund nga Altin Dumani, ccoi në shkarkimin e prokurorit të ndershëm në Shkodër.
Gjatë gjithë karrierës së tij, Agron Bushati, ka shërbyer në prokurorinë e Shkodrës duke kaluar një sërë sfidash me dosjet penale që kanë pasur ngarkesa me interes publik. E fundit ishte ajo e arrestimit në Shkodrës dhe më pas ndjekja gjyqësore e procesit të ekstradimit në Rusi, të Igor Kokunovit.
Në muajin Tetor 2023, kapja në pikën kufitare të Hanit të Hotit të një shtetasi Rus i lidhur me mafian Ruse, u kthye në çështjen serioze në gjykatën e Shkodrës.
Sapo është vunë në dijeni për arrestimin e tij në Shqipëri, autoritetet ruse, në vitin 2023 sollën në Shqipëri kërkesën për ekstradimin e rusit Igor Kokunov, që sipas tyre ishte i përfshirë në disa krime në rajonet e Moskës.
Sipas kartelës së kuqe të publikuar nga drejtësia ruse në sistemet e kërkimit të Interpol Moska, ai mban gradën “Gjeneral Hajdut” titull që e ka marrë nga një komision i mafies Ruse.
Por gjatë kohës që ai mbahej i izoluar në burgun e Reçit, në Shqipëri kanë mbërritur dy shtetas Ukrainas, Yvheni Petrenko dhe Bogdan Karychkivskyi, të cilët shfaqën interes për ta takuar “gjeneralin” Rus, Kokunov.
Dy ukrainasit kanë dëshiruar të hyjnë në burgun e Reccit dhe njëherësh të krijonin kushtet në gjykatën e Shkodrës, për të nxjerë në “arrest shtëpie”, Kokunovin, me qëllim arratisjen më pas të tij.
Nisur nga ky plan, shtetasi rus i arrestuar në Shkodër, Igor Kokunov, brenda 8 ditëve të muajit Tetor 2023 i është drejtuar 3 herë gjykatës së Shkodrës me kërkesë për të zbutur masën e sigurisë nga “arrest në burg” në “arrest shtëpie”, me pretekstin se Kokunov ishte i sëmurë nga zemra.
Kërkesë e cila është hedhur poshtë nga prokurori Bushati dhe miratuar edhe nga gjykata e Shkodrës.
Nisur nga kjo situatë e paprecedentë lëvizjesh të kryera nga Kokunov dhe dy shtetasit Ukrainas Yvheni Petrenko dhe Bogdan Karychkivskyi që ndodheshin jashtë, Drejtoria e Përgjithshme e Burgjeve, ka urdhëruar transferimin e Kokunovit nga burgu i Reçit drejt izolimit të tij në paraburgimin Nr. 313 në Tiranë.
Kjo lëvizje solli një parandalim të zbutjes së masës së sigurisë që mund të sillte arratisjen dhe më pas ekstradimin e “gjeneralit” Rus në drejtim të Moskës, aty ku shteti Rus e kishte dënuar me 15 vite burgim.
Kokunov, akuzohej për krime të tilla si rrëmbimi, zhvatja, grabitja, mashtrimi dhe organizimi i biznesit të paligjshëm.
Ai njihet ndryshe dhe me emrin “Vasya Bandit” dhe fillimisht u arrestua nga autoritetet ruse në qershor të vitit 2020. Ai gjithashtu akuzohet për koordinimin e kriminelëve në rajonet Sergiev Posad, Chekhov dhe Podolsk të rajonit të Moskës prej 27 vitesh.
