Forumi ndërkombëtar “Berlin Global Dialogue”! Rama: Kemi çelur 5 nga 6 grupkapituj gjatë 11 muajve të fundit, kemi pasur një vit të mbarë

GJERMANI-  Kryeministri Edi Rama deklaroi sot se Shqipëria po ecën në rrugën e duhur përsa i përket përparimit drejt anëtarësimit në Bashkimin Evropian. Gjatë fjalës së tij në Forumin “Berlin Global Dialogue”, Rama theksoi se Evropa ka po aq nevojë për Ballkanin Perëndimor sa edhe vetë rajoni ka pasur gjithmonë për Europën. Ai shtoi se një tjetër aspekt i rëndësishëm është konteksti i kufijve të Bashkimit Evropian, duke theksuar se BE-ja është një subjekt me dy kufij, dhe Shqipëria aktualisht është pjesë vetëm e kufirit territorial.

Moderatori: Duhet thënë që keni pasur një vit të mbarë, keni ecur mirë, jeni rizgjedhur, së pari, urime për rizgjedhjen.

Rama: Faleminderit shumë! Kemi pasur një vit të mbarë, po ta vendosim në kontekstin e Europës.

Moderatori: Shifrat flasin: vendi është kandidat zyrtar dhe ka çelur negociatat për në BE. Von der Leyen ka thënë që Shqipëria është në drejtimin e duhur, po ashtu Marta Kos ka theksuar që BE mendon se Shqipëria po përparon.

Rama: Gjatë 11 muajve të fundit kemi çelur 5 nga 6 grupkapituj. Kjo na inkurajon shumë. Në këtë moment, Europa është plotësisht e zgjuar, çka nuk ishte kështu vite më parë. Për këtë “zgjim” duhej agresioni brutal ndaj Ukrainës. Mund të shohim një dallim të madh: më parë BE thoshte që Ballkani Perëndimor është i rëndësishëm, por vetëm me fjalë, tani është e kundërta. Shqipëria ka çelur dhe mbyllur kapituj edhe më parë.