KOSOVË- Banka Qendrore e Kosovës ka lansuar të mërkurën një platformë të re, ku qytetarët mund të krahasojnë produktet dhe shërbimet financiare. Platforma përmban të dhëna nga 50 institucione financiare, përfshirë bankat, institucionet mikrofinanciare, institucionet jobankare dhe kompanitë e sigurimeve.
Banka Qendrore e Republikës së Kosovës, me qëllim të përmbushjes së vizionit për rritjen e transparencës, gjithëpërfshirjes financiare dhe fuqizimit të qytetarëve në marrjen e vendimeve të informuara, e prezantoi zyrtarisht në një ceremoni Platformën për Krahasimin e Produkteve dhe Shërbimeve Financiare.
Sipas një njoftimi për media, guvernatori i BQK-së, Ahmet Ismaili, në ceremoninë e lansimit të Platformës theksoi se ky hap përbën një avancim të rëndësishëm në transparencën dhe fuqizimin e konsumatorëve. Ai tha se platforma u jep përdoruesve një instrument për të krahasuar dhe zgjedhur produktet që u përshtaten më së miri nevojave të tyre, duke forcuar njëkohësisht besueshmërinë ndaj sektorit financiar dhe përgjegjshmërinë e institucioneve financiare.
Platforma pasqyron 17 kategori produktesh, të ndara në 60 nënprodukte dhe 203 ndarje të detajuara, me mbi 10 mijë të dhëna për krahasim dhe vendimmarrje.
“Platforma është e qasshme në gjuhën shqipe, serbe dhe angleze përmes faqes zyrtare të BQK-së [https://bqk-kos.org/] ose drejtpërdrejt nga linku i dedikuar [https://krahaso.bqk-kos.org/]. Ajo ofron neutralitet dhe qasje të thjeshtë. Platforma do të funksionojë në fazë testuese deri në fund të vitit, me qëllim të harmonizimit dhe përshtatjes me kërkesat teknike dhe rregullative”, thuhet në njoftim.
Gjithashtu bëhet e ditur se, përveç funksionit informues, platforma do të shërbejë edhe si mjet mbikëqyrës i BQK-së, duke siguruar që institucionet financiare të ofrojnë të dhëna të sakta dhe në përputhje me rregulloret.
“Edukimi financiar mbetet një nga prioritetet strategjike të Bankës Qendrore të Republikës së Kosovës për të zgjeruar njohuritë e qytetarëve lidhur me produktet dhe shërbimet financiare, në mënyrë që ata të kenë mundësi të negociojnë kushtet dhe të marrin vendime të mirëinformuara. Ky projekt është realizuar me mbështetjen e Fondit Evropian për Evropën Juglindore dhe të bashkëfinancuar nga Bashkimi Evropian”, thuhet më tej.
Banka Qendrore riafirmon përkushtimin e saj në promovimin e edukimit financiar, mbrojtjes së konsumatorit, inovacionit dhe avancimit të komunikimit me të gjitha palët e interesuara, duke mbetur e përkushtuar për të zhvilluar më tej sektorin financiar.
Ambasadori i Zyrës së Bashkimit Evropian në Kosovë, Aivo Orav, tha se kjo nismë është një shembull i fuqishëm i transparencës, duke theksuar rëndësinë e edukimit financiar.
“Sot flasim për tre çështje që prekin të gjithë: kuptimin e financave, informacionin e qartë dhe të saktë, si dhe sigurinë e konsumatorëve. Kjo nismë është një shembull se si kuptueshmëria vihet në praktikë. Por informacioni, në fakt, nuk është i mjaftueshëm. Kërkimi dhe siguria financiare janë të domosdoshme. Edukimi financiar në shkolla, fushatat informuese dhe mekanizmat mbrojtës duhet të sigurojnë që të gjithë të mund t’i shfrytëzojnë vërtet këto mundësi”, tha ai.
Ai shtoi se Bashkimi Evropian mbetet partner kyç i Kosovës në këtë drejtim.
“Kjo do të thotë se kemi edhe më shumë punë përpara. Bashkimi Evropian, ashtu si edhe Suedia dhe partnerë të tjerë, është partneri më i rëndësishëm i Kosovës në ofrimin e financimit për bizneset, për t’u mundësuar atyre të rriten dhe të inovojnë. Kontributi i BE-së nuk kufizohet vetëm në financim, por lidhet edhe me rritjen e ndërgjegjësimit dhe sigurisë, në mënyrë që njerëzit të marrin vendime të informuara dhe të ndërtojnë një të ardhme të fortë”.
Edhe përfaqësuesja e Finance in Motion dhe menaxhere e portofolit të Fondit Evropian për Evropën Juglindore (EFSE), Venera Hoxha, tha se ky projekt ka rëndësi strategjike për sistemin financiar.
“Kjo ngjarje shënon përpjekjet për finalizimin e një projekti të një niveli të tillë. Nuk është vetëm një projekt teknik, por një projekt strategjik, sepse nuk mbështet vetëm klientët, por edhe të gjithë aktorët e sistemit financiar. Është thelbësor për zhvillimin e tij”, u shpreh ajo./Monitor.al
