Arrestohet 29-vjeçari në Durrës, zbardhen shtatë raste vjedhjesh dhe tentativash për vjedhje (VIDEO)

DURRËS-  Një 29-vjeçar është vënë në pranga nga Policia e Durrësit, si autor i dyshuar i shtatë rasteve të vjedhjeve dhe tentativave për vjedhje të regjistruara gjatë muajit korrik. Arrestimi u bë në kuadër të operacionit policor të koduar “Lately”, pas një sërë veprimesh hetimore të kryera nga specialistët për Hetimin e Krimeve. Në pranga ra shtetasi H. B., banues në Durrës.

Sipas hetimeve, 29-vjeçari dyshohet se ka tentuar të vjedhë në dy banesa, ka vjedhur materiale ndërtimi, para, produkte, vegla pune, një biçikletë, si edhe bizhuteri e sende personale nga një automjet. Ai dyshohet gjithashtu se i ka vjedhur portofolin një shtetaseje të huaj në autobus. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.

"Durrës/Finalizohet operacioni i koduar “Lately”, zbardhen 7 vjedhje/tentativa për vjedhje, gjatë muajit korrik 2026.
Identifikohet dhe vihet në pranga autori i dyshuar.

Si rezultat i veprimeve intensive hetimore të kryera nga specialistët për Hetimin e Krimeve të Komisariatit të Policisë Durrës, për zbardhjen e vjedhjeve, u bë e mundur zbardhja e 7 rasteve të vjedhjes/tentativës për vjedhje, të kryera gjatë muajit korrik 2026, si dhe u arrestua autori i dyshuar, shtetasi: H. B., 29 vjeç, banues në Durrës.

Nga hetimet dyshohet se ky shtetas:
-më datë 03.07.2026, ka tentuar të vjedhë në 2 banesa në lagjen nr. 6, Durrës;
-më datë 14.07.2026, ka vjedhur materiale të ndryshme në lagjen nr. 17, Durrës,
-më datë 15.07.2026, në lagjen “Sektor Rinia”, ka thyer xhamin e automjetit të një shtetaseje dhe ka vjedhur aty bizhuteri floriri dhe sende të tjera personale;

-më datë 18.07.2026, ka vjedhur një shumë lekësh dhe disa produkte në një dyqan në fshatin Rrashbull;
-më datë 20.07.2026, në lagjen nr. 17, Durrës, ka vjedhur vegla dhe materiale të ndryshme pune në një automjet;
-më datë 21.07.2026, i ka vjedhur portofolin një shtetaseje të huaj në autobus;
-më datë 22.07.2026, ka vjedhur një biçikletë në lagjen nr. 1, Durrës.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme".