Premtimi i PS për pasaportën evropiane, Gonxhja: BE e gatshme për Shqipërinë, integrimi mund të përmbyllet brenda dy vitesh

Ministri i Ekonomisë, Kulturës dhe Inovacionit, Blendi Gonxhja, njëherazi kandidat për deputet në listën e hapur të Partisë Socialiste në Tiranë, deklaroi në një intervistë në emisionin “Open” në News24 se integrimi në Bashkimin Europian është një prej angazhimeve më të forta të PS në fushatën për zgjedhjet parlamentare të 11 majit.

Gonxhja theksoi se premtimi “Shqipëria 2030” është një simbolikë që përfaqëson mbylljen e dekadës me rezultate konkrete në rrugën drejt BE-së.

“Shifra 2030 është më shumë një nocion simbolik i përmbylljes së dekadës, jo një premtim kalendarik për një mandat të pestë. Por nëse e mbyllim këtë periudhë me rezultatet që po ndërtojmë, do të jetë një sukses historik”, tha Gonxhja.

Ai shtoi se anëtarësimi në BE nuk është vetëm vullnet i Shqipërisë, por edhe i vetë Bashkimit Europian dhe disa prej liderëve më të rëndësishëm europianë.

“Ka një mekanizëm real që e bën më të shpejtë anëtarësimin tonë. Ministria që unë drejtoj ka kapitujt më të rëndësishëm në negociata dhe në çdo hap që hedhim, ndjejmë mbështetjen e BE-së”, u shpreh ai.

Sipas tij, Shqipëria është në rrugë të mirë për të mbyllur konvergjencën ligjore dhe administrative me BE-në brenda dy viteve të ardhshme, duke e konsideruar këtë proces si një sfidë të përbashkët që kërkon përkushtim institucional dhe shoqëror.

“Për ne, procesi mbyllet kur jemi realisht gati, jo vetëm politikisht, por edhe teknikisht, për të qenë pjesë e familjes europiane”, përfundoi Gonxhja.