Universiteti “Luarasi” ka njoftuar një binjakëzim të rëndësishëm me London School of Economics (LSE), duke sjellë një mundësi unike për studentët shqiptarë për të ndjekur disa nga programet akademike më prestigjioze të ofruara nga një nga universitetet më të njohura botërore. Ky bashkëpunim i fokusohet zhvillimit të tre programeve akademike të reja: Menaxhim, Financë dhe Data Science.
E ftuar në emisionin “Open” në News24, Anni Dasho, zv/rektore e Universitetit “Luarasi”, e cila ka pasur një rol kyç në realizimin e këtij bashkëpunimi, shpjegoi detaje të rëndësishme për këtë mundësi. Ajo theksoi se ky ka qenë një proces i gjatë dhe i vështirë, i ngjashëm me akreditimin e universitetit pranë LSE dhe University of London.
“Ka qenë një proces i vështirë, që ka kërkuar angazhim të madh, dhe tani kemi të drejtën për të ofruar këto tre programe dhe për të dhënë dy diploma. Një diplomë e Universitetit të Londrës, nën drejtimin e LSE, dhe tjetra është diplomë e Universitetit “Luarasi””, shpjegoi ajo.
Kjo mundësi do t’u ofrojë studentëve të marrin një diplomë të njohur dhe të vlerësuar në të gjithë botën dhe të studiojnë me një kurrikulë identike me atë që ofrohet në LSE, por me një kosto shumë më të ulët.
Sipas Dashos, programet do të realizohen nga një set i licensuar pedagogësh, që janë pjesë e ajkës së fushave të Financës dhe Data Science në Shqipëri dhe që do të bashkëpunojnë me profesorë të eksëlentë nga Londra dhe rajoni. Ajo theksoi se gjithashtu, të gjitha lëndët do të kenë një nivel të lartë mësimdhënieje, në përputhje me standardet më të larta të LSE.
“Të gjitha lëndët do të kenë pedagogë të cilët janë ekspertë në fushat përkatëse dhe janë të licensuar nga instancat në Londër”, theksoi ajo.
Ky bashkëpunim është një mundësi e shkëlqyer për të gjithë studentët shqiptarë që duan të ndjekin një karrierë ndërkombëtare dhe të kenë mundësinë e një diplomë të njohur globalisht, duke studiuar afër shtëpisë.
Gjimnazistët e interesuar për këto programe mund të informohen më tej në faqen zyrtare të Universitetit “Luarasi” dhe duhet të plotësojnë disa kritere të pranimit. Kriteret përfshijnë një mesatare bazë 8 dhe një provim anglishteje sipas kërkesave të LSE.
Po ashtu, James Abdey, një ekspert i njohur nga LSE, do të udhëheqë një masterclass për 20 gjimnazistë të Tiranës, duke u ofruar mundësinë e një trajnimi intensiv për të kuptuar më shumë rreth mundësive që ofron ky bashkëpunim.
“Gjimnazistët mund të aplikojnë dhe të komunikojnë me ekipin e dedikuar për programet e LSE në Universitetin “Luarasi”,” shtoi Dasho.
Ky është një hap i rëndësishëm për arsimin e lartë në Shqipëri dhe një mundësi e shkëlqyer për studentët që dëshirojnë të ndjekin një edukim të nivelit botëror pa lënë vendin e tyre. Universiteti “Luarasi” është gati të pranojë gjimnazistët e parë që do të ndjekin këto programe nga 1 tetori, duke ofruar një mundësi unike për të studiuar dhe zhvilluar karrierën në një mjedis akademik të nivelit të lartë.
