Humbi jetën pasi mbeti i bllokuar në zjarr, zbulohet shkak i vdekjes së aktorit të njohur

Është bërë publik shkaku i vdekjes së aktorit Bobby J. Brown, i njohur për rolin e tij në serialin televiziv “The Wire”, disa muaj pasi ai humbi jetën në një zjarr që përfshiu një hambar. Sipas Zyrës së Mjekut Ligjor të Maryland, vdekja e 62-vjeçarit u shkaktua nga lëndime të shumta termike dhe thithja e tymit, ndërsa ngjarja është klasifikuar si aksident. Brown ndërroi jetë më 24 shkurt.

Vajza e tij, Reyna, ka treguar se e mësoi lajmin tragjik përmes një telefonate gjatë natës nga motra e saj më e vogël. Ajo tha se në fillim nuk mund ta besonte atë që kishte ndodhur dhe doli zbathur jashtë shtëpisë për t’u bindur se nuk ishte një makth, por realitet.

Sipas saj, gjatë përhapjes së flakëve, Bobby J. Brown i kishte kërkuar një të afërmi t’i sillte një fikëse zjarri në përpjekje për të përballuar zjarrin, ndërsa familja vazhdon të përjetojë me dhimbje humbjen e tij.

“Babai im ishte një njeri i mrekullueshëm dhe shumë i dashur nga komuniteti. Do t’u mungojë shumë njerëzve,” është shprehur Reyna.

Edhe agjenti i aktorit, Albert Bramante, i bëri homazh kujtimit të tij, duke e cilësuar Brown si “një aktor me talent të jashtëzakonshëm dhe integritet edhe më të madh”. Ai shtoi se përkushtimi dhe pasioni që tregonte në punën e tij ishin frymëzim për të gjithë ata që punonin me të.