Historia e policit në pension, 2 vite më parë Tahiri i dhuroi një motor, sot Policia e Shtetit kërkon t’ia marrë (Video)

Të gjithëve iu kujtohet Xhemil Haluli, efektivi i Policisë Rrugore i cili pas 45 vitesh punë doli në pension më 26 maj të 2016. Fundin e karrierës ai kishte kohë që e priste dhe ishte përgatitur moralisht dhe shpirtërisht. Për një njeri me uniformë të shkëputesh nga uniorma që të është bërë njësh me trupin është shumë e vështirë. Por për Xhemil Halulin, e shenjtë nuk ishte vetëm uniforma e policisë, por dhe motori me të cilin ai lëvizte në çdo lagje, në çdo rrugë, në çdo kryqëzim të Tiranës, në shi, në diell e në vapë.

Bashkë me pensionin si ish-polic që i takon me ligj, ish-ministri Saimir Tahiri i dhuroi Xhemil Halulit dhe motorin që përdorte prej vitesh, si mirënjohje për atë çfarë i kishte dhënë policisë së shtetit dhe gjithë shoqërisë në tërë këto vite.

Lotët dhe emocionet e Xhemal Halulit bënë për vete çdo shqiptar. Shumë qanë bashkë me të, shumë kuptuan pasionin që një njeri me uniformë ka për punën dhe megjithëse i ka dhënë shumë këtij vendi, pretendonte shumë pak një motor, që ishte bërë pjesë e pandarë e jetës së tij.

Sot pas dy vitesh Xhemil Halulin po e detyrojnë të qajë sërish. Këtë herë lotët e tij, nuk janë lotët e gëzimit por lotët e poshtërimit, lotët e mosmirënjohjes. Në një shtet që me një ministër të vlerëson dhe me një ministër që të poshtëron.

Atij i kanë dërguar një letër të turpshme, ku i thonë që motorin që mori duhet ta kthejë pas 2 vitesh. Motori ka një vlerë qesharake për Policinë e Shtetit, megjithëse për Xhemil Halulin ka një vlerë shumë të madhe shpirtërore.

Për të vënë në vend arkat e Policisë së Shtetit, presidenti i SIGAL, Avni Ponari është shprehur se motori duhet t’i kthehet policit pasi lekët do t’i paguajë kompania e tij.

https://youtu.be/wnmYAH0EgNo