Fitorja e parë për Arta Markun, gjykata administrative rrëzon padinë e...

Largimi i çiftit Gashi-Gina dy bashkëshortët që u shkarkuan nga Arta Marku u shoqërua me padinë e këtyre të fundit për Prokuroren e re të Përgjithshme të Përkohshme.

Padia e prokurores Rovena Gashi kundër shefes së saj të re, Arta Markut nuk u pranua nga Gjykata Administrative. Gashi pretendoi se shkarkimi i saj si Shefe e Sektorit të Dekriminalizimit ishte i pabazuar në ligj dhe për këtë iu drejtua me një padi gjykatës.

Por padia e Gashit është rrëzuar duke e lënë tashmë përfundimisht prokurore të thjeshtë në Prokurorinë e Përgjithshme.

Vendimi është marrë sot në Gjykatën Administrative nga gjyqtari Erarber Madhi gjatë një seance që zgjati më shumë se një orë. Ky vendim është cilësuar si cinik nga avokati i Gashit, Çlirim Gjata.

“Akoma s’më ka dhënë dikush përgjigje, mungon baza ligjore për lirimin nga detyra. Urdhri i lirimit ishte diçka cinike. Ka aq shumë shkelje madhore, një nga shkaqet që pranova të vij është se është shkarkuar një drejtoreshë drejtorie pa një motivacion, pa një pse. E para është procedura ligjore, e dyta motivacioni. Edhe pastrusen larg qoftë e largon kur ka shkelur ligjin. As në kohën e Enver Hoxhës s’do gjeni një shkarkim prokurori pa motivacion”, tha Çlirim Gjata i cili ka pranuar të mbrojë prokuroren Gashi në këtë çështje. Gjata tha se ky vendim do të ankimohet.

“Këto janë procedura ligjore që do shkojnë në vijën e tyre”, u shpreh Gjata. Kjo "betejë e parë" e Arta Markut duket se është fituar por mbetet për t'u parë se si do shkojë çështja në vazhdim. Seanca e radhës do mbahet më datë 30 janar