FOTO/ Ulja e nivelit të Danubit zbulon themelet e një ure të lashtë të Kostandinit të Madh

 

EVROPA- Niveli i ujit në lumin Danub ka rënë aq shumë sa pjesë të themeleve të Urës së lashtë të Kostandinit kanë dalë në sipërfaqe, duke u ofruar arkeologëve bullgarë një mundësi të rrallë për të studiuar një nga arritjet më mbresëlënëse inxhinierike të Perandorisë Romake, siç e përshkruajnë ata monumentin.

Sipas raportimeve të mediave të huaja, palët e njëpasnjëshme të nxehtësisë në Evropë këtë verë po shkaktojnë thatësira të mëdha në shumë pjesë të kontinentit, duke prekur rrugët kryesore ujore si lumenjtë Danub dhe Rajn.

"Për arkeologët, këto janë mundësi jashtëzakonisht të vlefshme sepse natyra zbulon për një kohë të shkurtër një objekt që zakonisht mbetet i fshehur nën ujërat e Danubit. Na jepet mundësia e rrallë ta vëzhgojmë, ta dokumentojmë dhe ta studiojmë në mjedisin e tij real", tha Pavel Popov, nga Muzeu i Historisë Rajonale të Plevenit.

Ura prej guri u ndërtua me urdhër të Perandorit Konstandin I dhe u përurua në vitin 328 pas Krishtit. Ajo lidhte qytetin e lashtë të Ulpia Oisk me Sucidavën, në Rumaninë e sotme. Me një gjatësi mbi 2 kilometra, ajo konsiderohet si një nga urat më të mëdha të antikitetit, por u përdor vetëm për disa dekada dhe besohet se është shkatërruar rreth vitit 367 pas Krishtit.

Të martën e kaluar, një ekip nga Muzeu i Plevenit kreu fotografi ajrore dhe dokumentim të themeleve të dukshme të urës, pranë fshatit Jugen në Bullgarinë veriore. Studiuesit përdorën mjete ajrore pa pilot për të hartuar dhe fotografuar mbetjet e strukturës, duke vlerësuar gjendjen e themeleve.